சட்டப்பேரவைத் தேர்தல் முடிவுகள்; பின்தங்கியிருந்த உதயநிதி முன்னிலை!

சென்னை,மே.04; தமிழ்நாடு சட்டப்பேரவைத் தேர்தலில் சேப்பாக்கம் – திருவல்லிக்கேணி தொகுதியில் போட்டியிட்ட துணை முதலமைச்சர் உதயநிதி ஸ்டாலின் 300 வாக்குகள் வித்தியாசத்தில் முன்னிலை பெற்றுள்ளார்.

சட்டப்பேரவைத் தேர்தல் வாக்கு எண்ணிக்கை நடைபெற்று வரும் நிலையில், சேப்பாக்கம் திருவல்லிக்கேணி தொகுதியில் போட்டியிட்ட துணை முதலமைச்சரும், திமுக இளைஞரணி தலைவருமான உதயநிதி ஸ்டாலின் தொடர்ந்து பின்னடைவை சந்தித்து வந்த நிலையில், குறைந்த வாக்குகள் வித்தியாசத்தில் முன்னிலைப் பெற்றுள்ளார்.

4 சுற்றுகளின் முடிவில் உதயநிதி 300 வாக்குகள் முன்னிலை

கொளத்தூர் தொகுதியில் 4 சுற்று வாக்குகள் எண்ணப்பட்ட நிலையில், தவெக வேட்பாளர் செல்வம் 14,123 வாக்குகளும், திமுக வேட்பாளர் உதயநிதி ஸ்டாலின் 14,423 வாக்குகளும், அதிமுக வேட்பாளர் ஆதி ராஜாராமன் 3,220 வாக்குகளும், நாதகவின் ஆயிஷா 582 வாக்குகளும் பெற்றுள்ளனர். இதனால் உதயநிதி ஸ்டாலின் தற்போது 300 வாக்குகள் முன்னிலைப் பெற்றுள்ளார்.

கருத்து கணிப்புகள் சொன்னது ஒன்று; முடிவுகள் வேறு…!!

தமிழ்நாடு சட்டப்பேரவைத் தேர்தலில் திமுக கூட்டணியே வெற்றிபெறும் என பல்வேறு கருத்துக்கணிப்புகள் வெளியான நிலையில், அனைத்து கட்சிகளுக்கும் ஷாக் கொடுக்கும் வகையில் விஜய்யின் தவெக பெரும்பான்மையான தொகுதிகளில் முன்னிலையில் உள்ளது. தற்போதைய நிலவரப்படி தவெக 108 தொகுதிகளிலும், அதிமுக கூட்டணி 66 தொகுதிகளிலும், திமுக கூட்டணி 60 தொகுதிகளிலும் முன்னிலையில் உள்ளது.

தமிழ்நாடு சட்டப்பேரவைத் தேர்தலுக்கான வாக்குப்பதிவு ஏப். 23-ம் தேதி ஒரே கட்டமாக நடைபெற்றது. தமிழ்நாட்டில் 85.10 சதவீத வாக்குகள் பதிவாகின. தமிழ்நாடு சட்டப்பேரவைத் தேர்தலில் நான்கு முனைப்போட்டி நிலவியது.

திமுக தலைமையிலான மதசார்பற்ற முற்போக்கு கூட்டணியில் காங்கிரஸ், தேமுதிக, விசிக, சிபிஎம், சிபிஐ, மதிமுக, கொமதேக, ஐயுஎம்எல், மமக உள்ளிட்ட கட்சிகள் இடம்பெற்றன. அதிமுக தலைமையிலான தேசிய ஜனநாயக கூட்டணியில் பாஜக, பாமக, அமமுக, தமாகா, ஐஜேகே உள்ளிட்ட கட்சிகள் இடம்பெற்றன. நாதக மற்றும் தவெக ஆகிய கட்சிகள் தனித்துப் போட்டியிட்டன.

யார் யார் எத்தனை தொகுதிகளில் போட்டியிட்டனர்?

திமுக தலைமையிலான மதசார்பற்ற முற்போக்கு கூட்டணியில் திமுக 164 தொகுதிகளிலும், காங்கிரஸ் 28, தேமுதிக 10, விசிக 8, சிபிஎம் 5, சிபிஐ 5, மதிமுக 4, கொமதேக 2, ஐயுஎம்எல் 2, மமக 2, எஸ்டிபிஐ 1, மஜக 1, முக்குலத்தோர் புலிப்படை 1, தமிழர் தேசம் கட்சி 1 தொகுதிகளில் போட்டியிட்டன.

அதிமுக தலைமையிலான தேசிய ஜனநாயக கூட்டணியில் அதிமுக 166 தொகுதிகளிலும், பாஜக 26 தொகுதிகளிலும், பாமக 18, அமமுக 11, தமாகா 4, ஐஜேகே 2, புரட்சி பாரதம் 1, புதிய நீதிக் கட்சி 1, தென்னிந்திய பார்வர்டு பிளாக் 1, சிங்கத் தமிழர் முன்னேற்ற கழகம் 1, தமிழ் மாநில பகுஜன் சமாஜ் 1 தொகுதிகளில் போட்டியிட்டன.