பெங்களூரு,பிப்.23; இந்தியன் சூப்பர் லீக் (ISL) கால்பந்து தொடரில் நேற்று (22.02.2026) நடைபெற்ற பெங்களூரு எஃப்சி (Bengaluru FC) மற்றும் நார்த்ஈஸ்ட் யுனைடெட் எஃப்சி (NorthEast United)அணிகளுக்கு இடையிலான விறுவிறுப்பான போட்டி 1-1 என்ற கோல் கணக்கில் சமனில் முடிந்தது. பெங்களூருவின் காண்டீரவா மைதானத்தில் நடைபெற்ற இந்த மோதலில் இரு அணிகளும் வெற்றி பெற கடுமையாகப் போராடின.
முதல் பாதியில் பெங்களூரு எஃப்சியின் ஆதிக்கம்
ஆட்டத்தின் தொடக்கத்திலிருந்தே பெங்களூரு எஃப்சி அணி ஆக்ரோஷமாக விளையாடியது. குறிப்பாக, ராகுல் பேகே (Rahul Bheke) இல்லாத நிலையில் அணியின் கேப்டன் பொறுப்பை ஏற்ற கோல்கீப்பர் குர்பிரீத் சிங் சாந்து (Gurpreet Singh Sandhu), ஆட்டத்தின் தொடக்க நிமிடங்களிலேயே நார்த்ஈஸ்ட் அணியின் கோல் முயற்சிகளைத் தடுத்து நிறுத்தினார்.
ஆட்டத்தின் 20-வது நிமிடத்தில், பெங்களூரு அணி வீரர் பிரையன் சான்செஸ் (Braian Sanchez) மைதானத்தின் நடுப்பகுதியில் இருந்து பந்தைக் கடத்திச் சென்று, நார்த்ஈஸ்ட் கோல்கீப்பரை ஏமாற்றி அபாரமாக ஒரு கோல் அடித்தார். இதன் மூலம் முதல் பாதியில் பெங்களூரு அணி 1-0 என முன்னிலை பெற்றது.
நார்த்ஈஸ்ட் யுனைடெட்டின் பதிலடி
இரண்டாவது பாதியில் ஆட்டம் மேலும் சூடுபிடித்தது. பின்தங்கியிருந்த நார்த்ஈஸ்ட் யுனைடெட் அணி கோல் அடிக்கத் தீவிரமாக முயன்றது. 60-வது நிமிடத்தில் நார்த்ஈஸ்ட் வீரர் தலையால் முட்டி அடித்த கோல் முயற்சியை குர்பிரீத் சிங் சாந்து மிகச் சிறப்பாகத் தடுத்தார்.
இருப்பினும், 68-வது நிமிடத்தில் மாற்று வீரராக களம் புகுந்த லால்ரின்சுவாலா லால்பியாக்னியா (Lalrinzuala Lalbiaknia), பெங்களூரு அணியின் தற்காப்பு அரணை உடைத்து அபாரமான முறையில் ஒரு கோலடித்தார். இதன் மூலம் ஆட்டம் 1-1 என்ற கணக்கில் சமநிலைக்கு வந்தது.
கடைசி நிமிடப் போராட்டம்
ஆட்டம் முடிலடையும் தருவாயில் இரு அணிகளும் வெற்றி கோல் அடிக்க கடுமையாக முயன்றன. பந்து ஒரு முனையிலிருந்து மறுமுனைக்கு மின்னல் வேகத்தில் சென்றது. ஆனால், இரு அணிகளின் தற்காப்பு வீரர்களும் சிறப்பாகச் செயல்பட்டதால் வேறு கோல்கள் எதுவும் விழவில்லை. ஆட்டம் சமனில் முடிந்ததால், இரு அணிகளும் தலா ஒரு புள்ளியைப் பெற்றன.
சொந்த மண்ணில் பெங்களூரு எஃப்சி அணிக்கு ஏமாற்றம்
இந்த சமநிலை முடிவின் மூலம் பெங்களூரு எஃப்சி மற்றும் நார்த்ஈஸ்ட் யுனைடெட் ஆகிய இரு அணிகளும் தங்கள் திறமையை நிரூபித்துள்ளன. சொந்த மண்ணில் பெங்களூரு அணிக்கு இது சற்று ஏமாற்றமாக இருந்தாலும், லால்பியாக்னியாவின் வருகை நார்த்ஈஸ்ட் அணிக்கு ஒரு புத்துயிரைக் கொடுத்தது. ஐஎஸ்எல் தரவரிசைப் பட்டியலில் முன்னேற இரு அணிகளுக்கும் அடுத்தடுத்த போட்டிகள் மிக முக்கியமானதாக அமையும்.