மும்பை,மார்ச்.04; டி20 உலகக் கோப்பை தொடரின் 2ஆவது அரையிறுதிச் சுற்று ஆட்டம் மும்பையின் வான்கடே மைதானத்தில் நாளை (மார்ச் 5, வியாழன்) நடைபெறுகிறது. இதில் நடப்புச் சாமியனான இந்தியாவும், பலம் வாய்ந்த இங்கிலாந்தும் மோதவுள்ளன. ஆனால், இந்தப் போட்டி மழையால் பாதிக்கப்பட்டால் இந்திய அணிக்கு மிகப்பெரிய பின்னடைவு ஏற்படும் சூழல் உருவாகியுள்ளது.
அரையிறுதிக்கு ‘ரிசர்வ் டே’ (Reserve Day) உண்டா
ஐசிசி விதிகளின்படி, அரையிறுதிப் போட்டிகளுக்கு மாற்று நாள் (Reserve Day) ஒதுக்கப்பட்டுள்ளது. நாளை (மார்ச் 5, வியாழன்) நடைபெறவுள்ள இந்தப் போட்டி மழையினால் முழுமையாகப் பாதிக்கப்பட்டால், ஆட்டம் அடுத்த நாளான மார்ச் 6-க்கு மாற்றப்படும். ஒருவேளை ஆட்டம் தொடங்கி இடையில் நின்றால், ரிசர்வ் நாளில் ஆட்டம் விட்ட இடத்திலிருந்து தொடங்கும்.
இந்தியா தொடரில் இருந்து வெளியேறும் அபாயம் உள்ளதா?
ரிசர்வ் நாளிலும் மழை நீடித்து, ஒரு பந்து கூட வீசப்படாமல் ஆட்டம் ரத்து செய்யப்பட்டால், ஐசிசி புள்ளிகள் பட்டியலை அடிப்படையாகக் கொண்டு முடிவை அறிவிக்கும்.
இங்கிலாந்தின் நிலை: சூப்பர் 8 சுற்றில் இங்கிலாந்து தனது பிரிவில் (Group 2) முதலிடம் பிடித்துள்ளது.
இந்தியாவின் நிலை: இந்தியா தனது பிரிவில் (Group 1) தென்னாப்பிரிக்காவிடம் தோல்வியடைந்ததால் இரண்டாம் இடத்தையே பிடித்தது.
ஐசிசி விதிகளின்படி, அரையிறுதி ரத்தானால் சூப்பர் 8 சுற்றில் அந்தந்த பிரிவுகளில் முதலிடம் பிடித்த அணிகளே நேரடியாக இறுதிப் போட்டிக்குத் தகுதி பெறும். இதன் காரணமாக, ஆட்டம் நடைபெறவில்லை என்றால் இந்தியா வெளியேற்றப்பட்டு, இங்கிலாந்து இறுதிப் போட்டிக்கு முன்னேறும்.
குறைந்தபட்சம் எத்தனை ஓவர்கள் வீசப்பட வேண்டும்?
லீக் போட்டிகளில் முடிவு தெரிய தலா 5 ஓவர்கள் வீசப்பட வேண்டும். ஆனால், அரையிறுதி மற்றும் இறுதிப் போட்டிகளில் முடிவை அறிவிக்க இரண்டு அணிகளும் தலா 10 ஓவர்கள் விளையாடி இருக்க வேண்டும் என்பது கட்டாயமாகும். கூடுதலாக, போட்டி நாளில் 90 நிமிடங்களும், ரிசர்வ் நாளில் 120 நிமிடங்களும் கூடுதல் நேரமாக வழங்கப்படும்.
வானிலை அறிக்கை என்ன சொல்கிறது?
மும்பையில் தற்போது மழைக்கான வாய்ப்பு மிகக் குறைவாகவே உள்ளது. வானிலை ஆய்வு அறிக்கையின்படி மார்ச் 5 மற்றும் 6 ஆகிய தேதிகளில் வானம் மேகமூட்டத்துடன் இருந்தாலும், மழை பெய்ய 0% வாய்ப்பே உள்ளதாகத் தெரிவிக்கப்பட்டுள்ளது. இதனால் ரசிகர்கள் முழுமையான 20 ஓவர் ஆட்டத்தைக் காணலாம் என எதிர்பார்க்கப்படுகிறது.
விளையாடி வென்று, இறுதிப்போட்டிக்குள் நுழைவதையே இந்தியா விரும்பும்!
சூரியகுமார் தலைமையிலான இந்திய அணி களத்தில் விளையாடி வெற்றி பெற்று இறுதிப் போட்டிக்குச் செல்லவே விரும்பும். புள்ளிகள் பட்டியல் அடிப்படையில் வெளியேறுவது ரசிகர்களுக்கும் அணிக்கும் பெரும் ஏமாற்றமாக அமையும். எனவே, வான்கடே மைதானத்தில் மழை குறுக்கிடாமல் ஒரு விறுவிறுப்பான ஆட்டம் அமைய வேண்டும் என்பதே அனைவரின் எதிர்பார்ப்பாக உள்ளது.