சென்னை,மே.16; ஐபிஎல் சீசனின் பிளே-ஆஃப் (Playoff) சுற்றுக்கான பந்தயம் தற்போது இறுதிக்கட்டத்தை எட்டியுள்ளது. நேற்று (மே 15, வெள்ளி) நடைபெற்ற லக்னோ சூப்பர் ஜெயண்ட்ஸ் (LSG) அணிக்கு எதிரான போட்டியில் சென்னை சூப்பர் கிங்ஸ் (CSK) அணி 7 விக்கெட் வித்தியாசத்தில் அதிர்ச்சி தோல்வியடைந்தது. இந்த தோல்வியால் சிஎஸ்கே அணியின் பிளே-ஆஃப் வாய்ப்பு பெரும் கேள்விக்குறியாக மாறியுள்ளதுடன், புள்ளிகள் பட்டியலிலும் பின்னடைவைச் சந்தித்துள்ளது.
புள்ளிகள் பட்டியலில் சிஎஸ்கே-வின் தற்போதைய நிலை என்ன?
லக்னோ அணிக்கு எதிரான ஆட்டத்தில் முதலில் பேட்டிங் செய்த சிஎஸ்கே, கார்த்திக்கின் அதிரடி அரைசதத்தின் உதவியோடு 20 ஓவர்களில் 5 விக்கெட் இழப்பிற்கு 187 ரன்கள் எடுத்தது. லக்னோ அணியின் வேகப்பந்து வீச்சாளர் ஆகாஷ் சிங் 3 விக்கெட்டுகளை வீழ்த்தி அசத்தினார். தொடர்ந்து ஆடிய லக்னோ அணியில், மிட்செல் மார்ஷ் வெறும் 38 பந்துகளில் 90 ரன்கள் குவித்து சென்னை அணியின் பந்துவீச்சை துவம்சம் செய்தார். இதனால் லக்னோ அணி எளிதாக வெற்றியைப் பெற்றது.
இந்தத் தோல்வியின் காரணமாக ஐந்து முறை சாம்பியனான சென்னை சூப்பர் கிங்ஸ் அணி புள்ளிகள் பட்டியலில் 6ஆவது இடத்திற்கு தள்ளப்பட்டுள்ளது. ராஜஸ்தான் ராயல்ஸ் (RR) அணியும் சென்னை அணிக்கு இணையான புள்ளிகளுடன் இருந்தாலும், அவர்கள் சிஎஸ்கே-வை விட ஒரு போட்டி குறைவாக விளையாடியுள்ளனர். மேலும் சிறந்த நெட் ரன் ரேட் (NRR) வைத்துள்ளதால் சிஎஸ்கே-வை விட சாதகமான நிலையில் உள்ளனர்.
பிளே-ஆஃப் வாய்ப்புகள்: சதவீத கணக்கு (Playoff Probability)
தற்போதைய கணிப்புகளின்படி, அணிகளின் பிளே-ஆஃப் செல்லும் வாய்ப்புகள் பின்வருமாறு கணக்கிடப்பட்டுள்ளது:
குஜராத் டைட்டன்ஸ் (GT): 16 புள்ளிகளுடன் முதலிடத்தில் இருக்கும் சுப்மன் கில் தலைமையிலான குஜராத் அணி 98% பிளே-ஆஃப் செல்லும் வாய்ப்போடு முதலிடத்தில் உள்ளது.
ராயல் சேலஞ்சர்ஸ் பெங்களூரு (RCB): 16 புள்ளிகளுடன் இருக்கும் ஆர்சிபி அணி 96.1% வாய்ப்புகளுடன் பலத்த போட்டியாளராக முன்னிலையில் இருக்கிறது.
சன்ரைசர்ஸ் ஐதராபாத் (SRH): 12 போட்டிகளில் 14 புள்ளிகள் பெற்றுள்ள ஐதராபாத் அணி 70.3% வாய்ப்பை பெற்றுள்ளது.
ராஜஸ்தான் ராயல்ஸ் (RR): பஞ்சாப் அணியை விட ஒரு புள்ளி குறைவாக இருந்தாலும், ராஜஸ்தான் அணி பிளே-ஆஃப் செல்ல 51.6% வாய்ப்புகள் உள்ளதாகக் கணிக்கப்பட்டுள்ளது. இது ஆர்சிபி-க்கு அடுத்தபடியாக நல்ல நிலையில் இருக்கும் அணிகளில் ஒன்றாகும்.
பஞ்சாப் கிங்ஸ் (PBKS): 12 போட்டிகளில் 13 புள்ளிகளுடன் இருக்கும் ஸ்ரேயாஸ் தலைமையிலான பஞ்சாப் அணி, அடுத்தடுத்த தோல்விகள் காரணமாக 48.8% வாய்ப்பை மட்டுமே கொண்டுள்ளது.
சென்னை சூப்பர் கிங்ஸ் (CSK): லக்னோவிடம் தோற்ற பிறகு, சிஎஸ்கே அணியின் பிளே-ஆஃப் வாய்ப்பு வெறும் 28.4% ஆகக் குறைந்து பெரும் சரிவைச் சந்தித்துள்ளது.
கேகேஆர் & டெல்லி கேபிடல்ஸ்: கொல்கத்தா நைட் ரைடர்ஸ் (KKR) 3.6% வாய்ப்பையும், டெல்லி கேபிடல்ஸ் (DC) 3.1% வாய்ப்பையும் மட்டுமே கொண்டுள்ளன. மும்பை மற்றும் லக்னோ அணிகள் ஏற்கனவே பிளே-ஆஃப் ரேசில் இருந்து வெளியேறிவிட்டன.
ருதுராஜ் கெய்க்வாட்டின் ‘சிம்பிள்’ பிளான்
இந்த இக்கட்டான சூழ்நிலை குறித்து கருத்து தெரிவித்துள்ள சிஎஸ்கே கேப்டன் ருதுராஜ் கெய்க்வாட், “எங்கள் கணக்கு இப்போது மிகவும் எளிதானது; இனி வரும் போட்டிகள் அனைத்திலும் நாங்கள் வெற்றி பெற்றே தீர வேண்டும்; அடுத்ததாக சென்னைக்குச் சென்று, எங்கு தவறு செய்தோம் என்பதை ஆராய்ந்து, உள்ளூர் ஆடுகள சூழலுக்கு ஏற்ப விரைவாக மாற வேண்டும்; இதில் குழப்பமடைய எதுவுமில்லை; வரும் நாட்களில் சிறப்பாகச் செயல்பட்டு மீண்டும் வெற்றிப் பாதைக்கு திரும்புவோம் என நம்புகிறேன்” என்று கூறியுள்ளார்.
2 ஆட்டங்களும் சிஎஸ்கே-வுக்கு வாழ்வா சாவா போராட்டம்தான்
ஐபிஎல் குழு சுற்றின் கடைசி இரு வாரங்கள் எஞ்சியுள்ள நிலையில், குஜராத் மற்றும் பெங்களூரு அணிகள் தங்களின் பிளே-ஆஃப் இடத்தை கிட்டத்தட்ட உறுதி செய்துவிட்டன. ஆனால், சென்னை சூப்பர் கிங்ஸ் அணிக்கு இனி வரும் 2 போட்டிகளும் ‘வாழ்வா-சாவா’ போராட்டமாக மாறப்போகிறது. சென்னை அணியின் ரசிகர்கள் எதிர்பார்த்தபடி ருதுராஜ் கெய்க்வாட் கூட்டணி மீதமுள்ள போட்டிகளில் அசாத்திய வெற்றிகளைப் பெற்று பிளே-ஆஃப் சுற்றுக்கு தகுதி பெறுமா என்பதைப் பொறுத்திருந்துதான் பார்க்க வேண்டும்.