மும்பை,மே.25; 19ஆவது ஐபிஎல் தொடர் (IPL 2026) மும்பை இந்தியன்ஸ் அணிக்கு ஒரு மறக்க முடியாத மோசமான தொடராக அமைந்துவிட்டது. கடந்த 2025 சீசனில் மூன்றாவது இடத்தைப் பிடித்த மும்பை அணி, இந்த முறை புள்ளிகள் பட்டியலில் 9ஆவது இடத்திற்குத் தள்ளப்பட்டு பெரும் ஏமாற்றத்தை அளித்துள்ளது. அணியின் இந்த மோசமான வீழ்ச்சிக்கு கேப்டன் ஹர்திக் பாண்ட்யாவின் (Hardik Pandya) தலைமைப் பண்பும், அவரது தனிப்பட்ட ஆட்டமும் தான் முக்கியக் காரணம் என்ற விமர்சனங்கள் பரவலாக எழுந்துள்ளன.
“எல்லாவற்றையும் முயன்று பார்த்தோம்” – உடைத்து பேசிய பொல்லார்ட்
மும்பை வான்கடே மைதானத்தில் நேற்று (மே 24, 2026)ஞாயிற்றுக்கிழமை நடைபெற்ற ராஜஸ்தான் ராயல்ஸ் அணிக்கு எதிரான கடைசி லீக் போட்டியிலும் மும்பை இந்தியன்ஸ் தோல்வியைத் தழுவியது. இப்போட்டிக்குப் பிறகு நடைபெற்ற செய்தியாளர்கள் சந்திப்பில் பேசிய மும்பை இந்தியன்ஸ் அணியின் பேட்டிங் பயிற்சியாளர் கீரன் பொல்லார்ட் (Kieron Pollard), ஹர்திக் பாண்ட்யாவின் கேப்டன்சி எதிர்காலம் குறித்து வெளிப்படையாகப் பேசினார்.
அவர் கூறும்போது, “தலைமைப் பண்பு என்ற கோணத்தில் இருந்து பார்த்தால், ஹர்திக் பாண்ட்யா ஒரு தனிநபராக தான் நினைத்தபடி சிறப்பாகச் செயல்படவில்லை என்பது உண்மைதான். நிர்வாகத் தரப்பிலும் நாங்கள் எதிர்பார்த்தபடி எதுவும் அமையவில்லை. ஆனால், இந்த ஃபிரான்சைஸியை (Franchise) அவர் வழிநடத்தவும், சிறப்பாகச் செயல்படவும் தேவையான அனைத்து வாய்ப்புகளையும், வழிகளையும் நாங்கள் செய்து கொடுத்தோம்” என்று பொல்லார்ட் வெளிப்படையாக ஒப்புக்கொண்டார்.
தோல்விக்கு கூட்டுப் பொறுப்பு: கீரன் பொல்லார்ட்
அதே நேரத்தில், தோல்விக்கு ஒருவரை மட்டுமே தனிப்பட்ட முறையில் குற்றஞ்சாட்ட முடியாது என்றும் பொல்லார்ட் கூறினார். “இங்கு அமர்ந்து கொண்டு யாரும் ஒருவரை மட்டும் விரல் நீட்டிக் குற்றம் சொல்லப் போவதில்லை. தோல்வி அடையும் போது, அதனை ஒட்டுமொத்த அணியின் தோல்வியாகவே பார்க்க வேண்டும். அவர் (பாண்ட்யா) கடினமாக முயன்றார், நாங்களும் முயன்றோம், ஆனால் இந்த முறை அது எங்களுக்குச் சாதகமாக அமையவில்லை. இப்போது எங்கள் காயங்களை ஆற்றிக் கொண்டு, அடுத்த 12 மாதங்களில் இன்னும் வலுவாக மீண்டு வரப் பார்ப்போம்” என்று தெரிவித்தார்.
மும்பை அணியில் அதிரடி மாற்றங்கள் வருமா?
அடுத்த சீசனுக்கு முன்பாக மும்பை இந்தியன்ஸ் அணியில் பெரிய மாற்றங்கள் செய்யப்படுமா என்ற கேள்விக்கு பதிலளித்த பொல்லார்ட், “இப்போது அதைப் பற்றிப் பேசுவதற்கான நேரமும் இடமும் இதுவல்ல. இப்போதைக்கு அவசரப்பட்டு எந்த முடிவையும் எடுத்தால் அது உணர்ச்சிவசப்பட்ட முடிவாக அமைந்துவிடும். என்ன தவறு நடந்தது என்பதை நிதானமாக யோசித்து ஆய்வு செய்ய அனைவருக்கும் கால அவகாசம் தேவை. அதன் பிறகே சிறந்த முடிவுகளை எடுக்க முடியும்” என்று கூறினார்.
பும்ராவிற்கு ஓய்வு அளித்தது ஏன்?
கடைசிப் போட்டியில் நட்சத்திர பந்துவீச்சாளர் ஜஸ்பிரித் பும்ராவிற்கு ஓய்வு அளிக்கப்பட்டது குறித்துப் பேசிய பொல்லார்ட், “பும்ரா இந்திய கிரிக்கெட்டின் மிக முக்கியமான சொத்து. இந்த போட்டியில் விளையாடி வெற்றி பெற்றிருந்தாலும் நாம் தகுதி பெறப் போவதில்லை. எனவே, இளம் வீரர்களுக்கு வாய்ப்பளிப்பதும், பும்ராவின் பணிச்சுமையைக் குறைப்பதும் தான் புத்திசாலித்தனமான முடிவு” என்று விளக்கமளித்தார்.
மும்பை இந்தியன்ஸ் ஐந்து முறை சாம்பியன் பட்டம் வென்ற வலுவான அணியாக இருந்தாலும், இந்த ஐபிஎல் சீசன் அவர்களுக்கு ஒரு பெரிய பாடமாக அமைந்துள்ளது. கீரன் பொல்லார்டின் இந்த வெளிப்படையான கருத்துகள், அடுத்த சீசனில் ஹர்திக் பாண்ட்யாவின் கேப்டன் பொறுப்பில் பெரிய மாற்றம் வரக்கூடும் என்பதற்கான மறைமுகமான அறிகுறியாகவே பார்க்கப்படுகிறது. எது எப்படியாக இருந்தாலும், அடுத்த மெகா ஏலத்திற்கு முன்பாக மும்பை நிர்வாகம் தங்களது வியூகங்களை மறுபரிசீலனை செய்ய வேண்டிய கட்டாயத்தில் உள்ளது.