கிரேட் நிக்கோபார் திட்டம்; “இயற்கைக்கும் பழங்குடியினருக்கும் எதிரான குற்றம்” – ராகுல் காந்தி கடும் தாக்கு!

டெல்லி,ஏப்.29; மத்திய அரசின் ரூ. 81,000 கோடி மதிப்பிலான கிரேட் நிக்கோபார் (Great Nicobar) உள்கட்டமைப்பு திட்டத்தை மக்களவை எதிர்க்கட்சித் தலைவர் ராகுல் காந்தி கடுமையாக விமர்சித்துள்ளார். இது நமது காலத்தின் மிகப்பெரிய ஊழல் என்றும், நாட்டின் இயற்கை மற்றும் பழங்குடிகளுக்கு எதிரான மன்னிக்க முடியாத குற்றம் என்றும் அவர் சாடியுள்ளார்.

தீவில் ராகுல் காந்தியின் நேரடி ஆய்வு

அந்தமான் நிக்கோபார் தீவுகளுக்கு பயணம் மேற்கொண்டுள்ள ராகுல் காந்தி, அங்குள்ள அடர்ந்த காடுகளை நேரில் பார்வையிட்டார். இது குறித்து தனது எக்ஸ் தளத்தில் பதிவிட்டுள்ள அவர், அரசு இதை ஒரு ‘திட்டம்’ என்று அழைக்கிறது, ஆனால் தான் அங்கு கண்டது வேறு என்று குறிப்பிட்டுள்ளார்.

“அரசு இதை ஒரு திட்டம் என்கிறது; ஆனால் நான் அங்கு பார்த்தது வெட்டுவதற்காக அடையாளமிடப்பட்ட லட்சக்கணக்கான மரங்களைத்தான்; 160 சதுர கிலோமீட்டர் பரப்பளவு கொண்ட மழைக்காடுகள் அழிக்கப்பட உள்ளன” என ராகுல் காந்தி வேதனை தெரிவித்தார்.

பழங்குடியினரின் உரிமைகள் பறிப்பு

இந்தத் திட்டத்தினால் அந்தத் தீவில் காலம் காலமாக வாழ்ந்து வரும் பழங்குடியின மக்களின் வாழ்வாதாரம் பாதிக்கப்படுவதாக ராகுல் காந்தி குற்றஞ்சாட்டியுள்ளார். அவர்களின் வீடுகள் பறிக்கப்படும் நிலையில், மக்களின் கருத்துகள் புறக்கணிக்கப்படுவதாக அவர் கூறினார்.

“நினைவு தெரிந்த காலத்திற்கு முன்பிருந்தே வளர்ந்த இந்த மரங்கள், தலைமுறை தலைமுறையாகப் பாதுகாக்கப்பட்ட காடுகள் மற்றும் அங்கு வாழும் அழகான மனிதர்களிடமிருந்து அவர்களுக்குச் சொந்தமானவை பறிக்கப்படுகின்றன” என்று அவர் தனது பதிவில் குறிப்பிட்டுள்ளார்.

திட்டத்தின் பின்னணி

மத்திய அரசு கிரேட் நிக்கோபார் தீவில் ஒரு சர்வதேச கொள்கலன் முனையம் (Transshipment Port), விமான நிலையம் மற்றும் மின் உற்பத்தி நிலையம் ஆகியவற்றை அமைக்கத் திட்டமிட்டுள்ளது. வியூக ரீதியாக இது முக்கியமானது என்று அரசு கூறினாலும், சூழலியல் ஆர்வலர்கள் மற்றும் எதிர்க்கட்சிகள் இதற்குக் கடும் எதிர்ப்பு தெரிவித்து வருகின்றனர்.

ராகுலின் விமர்சனத்தால் தேசியளவில் பெரும் விவாதம்

சுற்றுச்சூழல் சமநிலை மற்றும் பழங்குடியின மக்களின் பாதுகாப்பு ஆகியவற்றை முன்னிறுத்தி ராகுல் காந்தி முன்வைத்துள்ள இந்த விமர்சனம், தேசிய அளவில் பெரும் விவாதத்தை ஏற்படுத்தியுள்ளது. வளர்ச்சி என்ற பெயரில் இயற்கையை அழிப்பது எதிர்காலத்திற்குப் பெரும் அச்சுறுத்தலாக அமையும் என்பதே சமூக ஆர்வலர்களின் கருத்தாக உள்ளது.