குவைத்தில் பலியான தமிழரின் உடல் நாளை தாயகம் வருகிறது; வளைகுடா நாடுகளில் பணிபுரியும் தமிழர்களை பாதுகாக்க தலைவர்கள் வலியுறுத்தல்!

சென்னை,மார்ச்.31; மத்திய கிழக்கில் போர் பதற்றம் அதிகரித்து வரும் நிலையில், குவைத்தில் உள்ள மின் உற்பத்தி நிலையம் மீது ஈரான் நடத்திய ஏவுகணை தாக்குதலில் தமிழ்நாட்டைச் சேர்ந்த தொழிலாளி ஒருவர் உயிரிழந்த சம்பவம் பெரும் சோகத்தை ஏற்படுத்தியுள்ளது.

குவைத்தில் நிகழ்ந்த கோரத் தாக்குதல்

அமெரிக்கா மற்றும் இஸ்ரேலுக்கும், ஈரானுக்கும் இடையே கடந்த ஒரு மாதத்திற்கும் மேலாக போர் நீடித்து வருகிறது. இதன் ஒரு பகுதியாக, குவைத்தில் உள்ள மின்சாரம் மற்றும் கடல்நீர் குடிநீராக்கும் நிலையம் (Power and Desalination Plant) மீது நேற்று (மார்ச் 31, திங்கள்) அதிகாலை ஈரான் ஏவுகணை மற்றும் ட்ரோன் மூலம் தாக்குதல் நடத்தியது. இந்தத் தாக்குதலில் அங்கிருந்த சேவை கட்டடங்கள் கடுமையாக சேதமடைந்தன.

ராமநாதபுரத்தைச் சேர்ந்த தமிழர் உயிரிழப்பு

இந்தத் தாக்குதலின் போது அங்கு பணியில் இருந்த இந்தியத் தொழிலாளி ஒருவர் சம்பவ இடத்திலேயே உயிரிழந்தார். விசாரணையில், அவர் தமிழகத்தின் ராமநாதபுரம் மாவட்டம், முதுகுளத்தூரைச் சேர்ந்த சந்தான செல்வம் என்பது உறுதி செய்யப்பட்டுள்ளது. கடந்த 15 ஆண்டுகளாக குவைத்தில் பணியாற்றி வந்த இவருக்கு, மனைவியும் இரண்டு குழந்தைகளும் உள்ளனர். இவரது மறைவுச் செய்தி அவரது சொந்த ஊரில் பெரும் சோகத்தை ஏற்படுத்தியுள்ளது.

உடலை தாயகத்திற்கு கொண்டுவர நடவடிக்கை

சந்தான செல்வத்தின் உயிரிழப்பு குறித்து குவைத்தில் உள்ள இந்தியத் தூதரகம் ஆழ்ந்த இரங்கலைத் தெரிவித்துள்ளது. அவரது உடலை அடையாளம் காண்பதற்காக இந்தியத் தூதர் மத்திய சவக்கிடங்குக்குச் சென்று பார்வையிட்டார். உயிரிழந்தவரின் உடலைச் சொந்த ஊருக்குக் கொண்டு வருவதற்கான அனைத்து சட்டப்பூர்வ நடவடிக்கைகளையும் இந்தியத் தூதரகம் எடுத்து வருகிறது.

நாளை (ஏப்ரல் 1) அவரது உடல் உறவினர்களிடம் ஒப்படைக்கப்பட்டு, விமானம் மூலம் தமிழ்நாட்டுக்க கொண்டு வரப்படும் என்று எதிர்பார்க்கப்படுகிறது.

அரசியல் தலைவர்கள் இரங்கல்

இந்தத் துயரச் சம்பவத்திற்கு அமமுக பொதுச்செயலாளர் டிடிவி தினகரன் உள்ளிட்ட பல அரசியல் தலைவர்கள் இரங்கல் தெரிவித்துள்ளனர். உயிரிழந்தவரின் குடும்பத்திற்கு உரிய இழப்பீடு வழங்கவும், போர்ச் சூழலில் அங்கு சிக்கியுள்ள மற்ற தமிழர்களின் பாதுகாப்பை உறுதி செய்யவும் மத்திய, மாநில அரசுகள் நடவடிக்கை எடுக்க வேண்டும் என்று அவர்கள் கோரிக்கை விடுத்துள்ளனர்.

மத்திய கிழக்கில் நிலவும் போர் சூழலால் இதுவரை 8 இந்தியர்கள் பலியாகியுள்ளனர் என்பது குறிப்பிடத்தக்கது. வாழ்வாதாரத்திற்காக வெளிநாடு சென்ற தமிழர் போரின் கோரப்பிடிக்கு பலியானது தமிழக மக்களிடையே பெரும் அதிர்ச்சியை ஏற்படுத்தியுள்ளது.