‘அனலாக் பனீர்’ உற்பத்தி மற்றும் விற்பனைக்கு தடை; தரமற்ற மாதிரிகள் கண்டறியப்பட்டதால் நடவடிக்கை.
செயற்கைப் பனீர் தடை காரணமாக மஹாராஷ்டிராவில் முக்கிய நடவடிக்கை எடுக்கப்பட்டுள்ளது. பாலுக்குப் பதிலாக தாவர எண்ணெய் மற்றும் ரசாயனங்களால் தயாரிக்கப்படும் அனலாக் பனீர் உற்பத்தி மற்றும் விற்பனைக்கு அரசு ஓராண்டு தடை விதித்துள்ளது.
செயற்கைப் பனீர் உற்பத்தி மற்றும் விற்பனைக்கு மகாராஷ்டிரா அரசு ஓராண்டு தடை விதித்துள்ளது. பாலுக்குப் பதிலாக தாவர எண்ணெய் மற்றும் ரசாயனங்களை பயன்படுத்தி தயாரிக்கப்படும் ‘அனலாக் பனீர்’ (Analog Paneer) பொதுமக்களுக்கு உண்மையான பனீர் என விற்பனை செய்யப்பட்டதாக கண்டறியப்பட்டதைத் தொடர்ந்து இந்த நடவடிக்கை எடுக்கப்பட்டுள்ளது.
உணவுப் பாதுகாப்புத் துறை ஆய்வில் அதிர்ச்சி தகவல்
உணவுப் பாதுகாப்புத் துறை நடத்திய ஆய்வில், உணவகங்கள் மற்றும் கேட்டரிங் நிறுவனங்கள் நுகர்வோருக்குத் தெரியாமல் செயற்கைப் பனீரை உண்மையான பனீர் என பயன்படுத்தியிருப்பது தெரியவந்தது. மேலும், பரிசோதிக்கப்பட்ட மாதிரிகளில் 35 சதவீதத்திற்கும் அதிகமானவை தரம் குறைந்தவை என கண்டறியப்பட்டதாக அதிகாரிகள் தெரிவித்துள்ளனர்.
இதையடுத்து, பொதுமக்களின் உடல்நலனைப் பாதுகாக்கும் நோக்கில் ‘அனலாக் பனீர்’ உற்பத்தி மற்றும் விற்பனைக்கு ஓராண்டு தடை விதிக்கப்பட்டுள்ளது.