கும்பகோணம்,ஏப்.14; தமிழ்நாடு அரசியல் களம் தேர்தல் சூட்டில் கொதித்து வரும் நிலையில், தமாகா தலைவர் ஜி.கே.வாசனை மார்க்சிஸ்ட் கம்யூனிஸ்ட் கட்சியின் மத்திய குழு உறுப்பினர் ராமகிருஷ்ணன் கடுமையாக விமர்சித்துள்ளார். கும்பகோணத்தில் நடைபெற்ற தேர்தல் பரப்புரைக் கூட்டத்தில் அவர் பேசிய கருத்துகள் தற்போது பெரும் விவாதத்தை கிளப்பியுள்ளன.
பாஜகவுடன் கூட்டணி; ராமகிருஷ்ணன் கேள்வி
கும்பகோணம் தொகுதி திமுக வேட்பாளர் சாக்கோட்டை க.அன்பழகனை ஆதரித்து ராமகிருஷ்ணன் பரப்புரையில் ஈடுபட்டார். அப்போது பேசிய அவர், “விவசாயம் செழிக்கும் தஞ்சை மண்ணைச் சேர்ந்த ஜி.கே.வாசன், விவசாயிகளுக்கு எதிரான நிலைப்பாட்டை எடுக்கும் பாஜகவுடன் கூட்டணி வைத்திருப்பது வேதனையளிக்கிறது; நெல்லுக்கு ஊக்கத்தொகை வழங்கக்கூடாது என்று மத்திய அரசு கூறுகிறது; இதைக் கூட எதிர்க்காத வாசன், எப்படி தாமரை சின்னத்திற்கு வாக்கு கேட்க முடிகிறது?” என்று கேள்வி எழுப்பினார்.
இலவச மின்சாரத்திற்கு ஆபத்து
மத்திய அரசின் புதிய மின்சாரக் கொள்கையையும் அவர் கடுமையாக சாடினார். “1989-ல் மறைந்த முதல்வர் கருணாநிதி கொண்டு வந்த இலவச மின்சாரத் திட்டம், இன்று ஆபத்தில் உள்ளது; மத்திய அரசின் புதிய திட்டத்தால் மின்சாரம் தனியார் மயமாகும் அபாயம் உள்ளது; விவசாயிகளின் வாழ்வாதாரமான இலவச மின்சாரத்தை பறிக்கத் துடிக்கும் பாஜகவின் சின்னத்தில் தமாகாவினர் போட்டியிடுவது துரோகம்” என ராமகிருஷ்ணன் குற்றஞ்சாட்டினார்.
“மூப்பனார் இதை ஏற்றிருக்க மாட்டார்”
ஜி.கே.வாசனின் தந்தை மறைந்த ஜி.கே.மூப்பனார் குறித்துப் பேசிய ராமகிருஷ்ணன், “ஜி.கே.மூப்பனார் இன்று உயிருடன் இருந்திருந்தால், தன் கட்சியை பாஜகவிடம் அடகு வைத்ததற்காக வாசனை அடித்திருப்பார்; இந்த முடிவை அவர் ஒருபோதும் ஏற்றிருக்க மாட்டார்; குறைந்தபட்சம் அதிமுகவின் சின்னத்திலாவது போட்டியிட்டிருக்கலாம், ஆனால் கொள்கை முரண்பாடு கொண்ட தாமரை சின்னத்தைத் தேர்ந்தெடுத்தது ஏன்?” என்று சாடினார்.
அதிமுக மற்றும் சட்டம் ஒழுங்கு விமர்சனம்
அதிமுக பொதுச்செயலாளர் எடப்பாடி பழனிசாமியையும் ராமகிருஷ்ணன் விட்டுவைக்கவில்லை. சாத்தான்குளம் தந்தை-மகன் மரணம் மற்றும் தூத்துக்குடி ஸ்டெர்லைட் துப்பாக்கிச் சூடு சம்பவங்களை நினைவுகூர்ந்த அவர், தமிழ்நாட்டில் சட்டம் ஒழுங்கு பற்றி பேச அதிமுகவுக்கு தகுதியில்லை என்று கூறினார். தேர்தல் முடிவுகளுக்குப் பிறகு அதிமுக மற்றும் தமாகா ஆகிய கட்சிகள் காணாமல் போகும் என்றும் அவர் கணித்துள்ளார்.
“அதிமுக கூட்டணியை தோற்கடிக்க மக்கள் தயாராகிவிட்டனர்”
தமிழ்நாட்டின் சமூக நீதி, மதச்சார்பின்மை மற்றும் விவசாயிகளின் நலனைப் பாதுகாக்க உதயசூரியன் சின்னத்திற்கு வாக்களிக்க வேண்டும் என்று ராமகிருஷ்ணன் வேண்டுகோள் விடுத்தார். பாஜக மற்றும் அதிமுக கூட்டணியைத் தோற்கடிக்க மக்கள் தயாராகிவிட்டதாகவும் ராமகிருஷ்ணன் நம்பிக்கை தெரிவித்தார்.