டெல்லி, ஜன.07; ஐசிசி ஆண்கள் டி20 உலகக்கோப்பை தொடர் தொடர்பான சர்ச்சைகள் தற்போது சூடுபிடித்துள்ளன. இந்தியாவில் நடைபெற வேண்டிய தங்கள் நாட்டுப் போட்டிகளை இலங்கைக்கு மாற்ற வேண்டும் என்ற வங்கதேச கிரிக்கெட் வாரியத்தின் கோரிக்கையை சர்வதேச கிரிக்கெட் கவுன்சில் (ICC) திட்டவட்டமாக நிராகரித்துள்ளது.
வங்கதேசத்தின் பிடிவாதமும் ஐசிசியின் எச்சரிக்கையும்
சமீபத்தில் ஐபிஎல் தொடரில் இருந்து வங்கதேச வேகப்பந்து வீச்சாளர் முஸ்தஃபிசுர் ரஹ்மான் விடுவிக்கப்பட்டதைத் தொடர்ந்து, இந்தியாவுக்கும் வங்கதேசத்துக்கும் இடையே கிரிக்கெட் ரீதியான பதற்றம் அதிகரித்துள்ளது. இதன் காரணமாக, இந்தியாவில் விளையாடுவது தங்கள் வீரர்களுக்குப் பாதுகாப்பு இல்லை எனக் கூறி, போட்டிகளை இலங்கைக்கு மாற்ற வங்கதேசம் கோரிக்கை விடுத்தது.
வங்கதேசத்தின் கோரிக்கையை ஏற்க ஐசிசி மறுப்பு
இருப்பினும், ஐசிசி தலைவர் ஜெய் ஷா தலைமையிலான நிர்வாகம் இந்தக் கோரிக்கையை ஏற்க மறுத்துவிட்டது. செவ்வாய்க்கிழமையன்று காணொளி வாயிலாக நடந்த கூட்டத்தில், “திட்டமிட்டபடி போட்டிகள் இந்தியாவிலேயே நடக்கும். இதில் எந்த மாற்றமும் இருக்காது” என்று ஐசிசி தரப்பில் தெளிவுபடுத்தப்பட்டுள்ளது.
போட்டியைப் புறக்கணித்தால் புள்ளிகள் பறிபோகும்!
இந்தியாவுக்கு வந்து விளையாட வங்கதேசம் மறுப்பு தெரிவித்தால், அந்த அணிக்கு வழங்கப்பட வேண்டிய புள்ளிகள் ரத்து செய்யப்படும் அல்லது போட்டியில் இருந்து அவர்கள் நீக்கப்படலாம் (Forfeit) என்று ஐசிசி கடுமையான எச்சரிக்கை விடுத்துள்ளதாகத் தகவல்கள் தெரிவிக்கின்றன. உலகக்கோப்பை போன்ற பெரிய தொடர்களில் பாதுகாப்பு காரணங்களைக் கூறி கடைசி நேரத்தில் இடமாற்றம் செய்வது சாத்தியமில்லை என்று ஐசிசி வட்டாரங்கள் தெரிவிக்கின்றன.
சர்ச்சையின் பின்னணி என்ன?
இந்த விவகாரம் முஸ்தஃபிசுர் ரஹ்மானை கொல்கத்தா நைட் ரைடர்ஸ் அணி விடுவித்ததில் இருந்து தொடங்கியது. பிசிசிஐ-யின் தலையீட்டால் அவர் நீக்கப்பட்டதாகக் கூறப்பட்ட நிலையில், வங்கதேச அரசு இதற்கு கடும் கண்டனம் தெரிவித்தது. மேலும், “எங்கள் வீரர்களுக்கு இந்தியாவில் பாதுகாப்பு இல்லை என்றால், நாங்கள் அங்கு விளையாட மாட்டோம்” என்று வங்கதேச விளையாட்டுத் துறை ஆலோசகர் ஆசிப் நஸ்ருல் தெரிவித்திருந்தது குறிப்பிடத்தக்கது.
ஐசிசியின் முடிவுக்கு கட்டுப்பட்டு வங்கதேசம் இந்தியாவில் விளையாடுமா?
தற்போதுள்ள சூழலில், வங்கதேச கிரிக்கெட் வாரியம் ஐசிசியின் முடிவுக்குக் கட்டுப்பட்டு இந்தியாவுக்கு வந்து விளையாடுமா அல்லது தனது முடிவில் உறுதியாக இருக்குமா என்பது மில்லியன் டாலர் கேள்வியாக உள்ளது. பிப்ரவரி 7ஆம் தேதி தொடங்கவுள்ள இந்தத் தொடரில், வங்கதேச அணி தனது முதல் போட்டியில் கொல்கத்தாவில் விளையாட திட்டமிடப்பட்டுள்ளது.