புதுச்சேரி,மார்ச்.18; புதுச்சேரி சட்டமன்றத் தேர்தலுக்கு வேட்புமனு தாக்கலே தொடங்கிவிட்ட நிலையில், என்.ஆர்.காங்கிரஸ்-பாஜக கூட்டணியில் புயல் வீசத் தொடங்கியுள்ளது.
கூட்டணிக் குழப்பங்கள், தொகுதிப் பங்கீடு இழுபறிகள் எனத் தொடரும் அரசியல் நகர்வுகளுக்கு இடையே, என்.ஆர்.காங்கிரஸ் கட்சியின் ஒரு முக்கிய அறிவிப்பு புதுச்சேரி அரசியலில் சூறாவளியாய் சுழன்றடிக்கிறது.
பாஜக – என்.ஆர்.காங்கிரஸ் கூட்டணியில் விரிசலா?
புதுச்சேரியில் என்.ஆர்.காங்கிரஸ் மற்றும் பாஜக கூட்டணி தொடரும் என்று மத்திய அமைச்சர் அமித் ஷா முன்னிலையில் உறுதி செய்யப்பட்டிருந்தது. இதன்படி, என்.ஆர்.காங்கிரஸிற்கு 16 தொகுதிகள் ஒதுக்கப்பட்டன. மீதமுள்ள 14 இடங்களை பாஜக மற்றும் அதன் கூட்டணிக் கட்சிகள் பகிர்ந்து கொள்வதாக இருந்தது.
ஆனால், லாட்டரி அதிபர் மார்ட்டினின் மகனான ஜோஸ் சார்லஸ் மார்ட்டினின் லட்சிய ஜனநாயக கட்சியை (லஜக) கூட்டணியில் சேர்ப்பதற்கு முதலமைச்சர் ரங்கசாமி கடும் எதிர்ப்பு தெரிவித்துள்ளார். தனது அரசை விமர்சித்து வந்த ஒருவரை கூட்டணியில் சேர்ப்பதை ரங்கசாமி விரும்பவில்லை. இதனால் மத்திய அமைச்சர் மன்சுக் மாண்டவியா உடனான பேச்சுவார்த்தையில் முட்டுக்கட்டை ஏற்பட்டது.
தவெக எங்களின் இரண்டாவது சாய்ஸ்; அதிரடி அறிவிப்பு
கூட்டணிப் பேச்சுவார்த்தையில் இழுபறி நீடிக்கும் நிலையில், என்.ஆர்.காங்கிரஸ் கட்சியின் பொதுச் செயலாளர் ஜெயபால் வெளியிட்டுள்ள அறிக்கை அரசியல் வட்டாரத்தை அதிர வைத்துள்ளது. “பாஜகவுடன் சுமுக முடிவு எட்டப்படாவிட்டால், நடிகர் விஜய்யின் தமிழக வெற்றிக் கழகத்துடன் (TVK) கூட்டணி அமைக்கத் தயார்” என்று அவர் தெரிவித்துள்ளார்.
அவர் கூறிய முக்கிய அம்சங்கள்:
பாஜக உடனான கூட்டணிக்கு முன்னுரிமை அளிக்கிறோம்.
ஆனால், எங்கள் நிபந்தனைகளை ஏற்காவிட்டால் தவெக தான் எங்களின் இரண்டாவது சாய்ஸ்.
தவெக-வுடன் கூட்டணி அமைந்தால் என்.ஆர்.காங்கிரஸ் 20 இடங்களில் போட்டியிடும்.
விஜய்யின் தவெக-விற்கு கிடைக்கும் வாய்ப்பு?
நடிகர் விஜய் அரசியல் கட்சியைத் தொடங்கிய பிறகு, பெரிய கட்சிகள் எதுவும் இதுவரை நேரடியாகக் கூட்டணி குறித்துப் பேசாத நிலையில், புதுச்சேரி ஆளுங்கட்சியான என்.ஆர்.காங்கிரஸ் இத்தகைய அறிவிப்பை வெளியிட்டிருப்பது விஜய் ரசிகர்களிடையே பெரும் உற்சாகத்தை ஏற்படுத்தியுள்ளது. 2026 தேர்தலை நோக்கிய விஜய்யின் பயணத்திற்கு இது ஒரு முக்கிய மைல்கல்லாகப் பார்க்கப்படுகிறது.
முடிவு யாரிடம்?
தற்போது பாஜக மேலிடம் புதுச்சேரி நிர்வாகிகளுடன் டெல்லியில் ஆலோசனை நடத்தி வருகிறது. லட்சிய ஜனநாயக கட்சியை கழற்றிவிட்டு ரங்கசாமியை சமாதானப்படுத்துமா அல்லது தனித்து நிற்குமா என்பது விரைவில் தெரிந்துவிடும்.
புதுச்சேரி அரசியலில் ரங்கசாமியின் இந்த ‘தவெக’ கார்டு, பாஜகவிற்கு ஒரு மறைமுக அழுத்தத்தைக் கொடுத்துள்ளது. எது எப்படியோ, வரும் வெள்ளிக்கிழமை வேட்புமனுத் தாக்கலின் போது புதுச்சேரியின் உண்மையான கூட்டணிக் கணக்கு வெளிச்சத்திற்கு வரும்.