சென்னை,ஏப்.02; தமிழ்நாடு அரசியல் களம் சட்டப்பேரவைத் தேர்தலை நோக்கி அனல் பறக்கத் தொடங்கியுள்ளது. இந்நிலையில், திமுக கூட்டணியில் தொகுதிப் பங்கீடு தொடர்பாக விடுதலைச் சிறுத்தைகள் கட்சித் தலைவர் தொல். திருமாவளவன் தெரிவித்திருக்கும் கருத்துகள் அரசியல் வட்டாரத்தில் பெரும் பரபரப்பை ஏற்படுத்தியுள்ளன.
விரும்பிய தொகுதிகள் கிடைக்கவில்லையா?
இதுதொடர்பாக அளித்திருக்கும் பேட்டி ஒன்றில், தங்களுக்குத் தேவையான தொகுதிகளைப் பெறுவதில் உள்ள சவால்களை வெளிப்படையாகப் பகிர்ந்து கொண்டார். குறிப்பாக, கடந்த முறை சிறப்பாகப் பணியாற்றிய சிட்டிங் எம்.எல்.ஏ-க்களான ஆளூர் ஷாநவாஸ், எஸ்.எஸ்.பாலாஜி மற்றும் பனையூர் பாபு ஆகியோருக்கு மீண்டும் வாய்ப்பு வழங்கப்படாதது குறித்து அவர் விளக்கம் அளித்தார்.
“நாங்கள் கேட்ட பல தொகுதிகள் எங்களுக்குக் கிடைக்கவில்லை. உதாரணமாக, நாங்கள் அரூர் தொகுதியைக் கேட்டோம், ஆனால் திமுக எங்களுக்கு அரக்கோணம் தொகுதியையே வழங்கியது. அதேபோல், பல்லாவரம் தொகுதியை எதிர்பார்த்தோம், ஆனால் அது தேமுதிக-விற்குச் சென்றுவிட்டது. இறுதியில் எங்களுக்கு பண்ருட்டி வழங்கப்பட்டது” என தனது ஆதங்கத்தைப் பதிவு செய்தார்.
ஆளூர் ஷாநவாஸ் விவகாரம்: திருமாவளவன் விளக்கம்
நாகை தொகுதியில் கடந்த முறை வென்ற ஆளூர் ஷாநவாஸிற்கு ஏன் மீண்டும் வாய்ப்பு வழங்கப்படவில்லை என்ற கேள்விக்கு பதிலளித்த திருமாவளவன்:
நாகை தொகுதியில் போட்டியிட ஷா நவாஸ் விரும்பவில்லை என்று சொல்லப்பட்டது. ஷாநவாஸ் ராயபுரம் அல்லது பல்லாவரம் தொகுதிகளை விரும்பினார். கடைசியில் நாகை தொகுதி ஜவாஹிருல்லாவின் மனிதநேய மக்கள் கட்சிக்குச் சென்றுவிட்டது. ஆனால், கூட்டணிக் கணக்குகளால் அந்தத் தொகுதிகளைப் பெற முடியவில்லை.
இது ஷா நவாஸைத் தடுப்பதற்கான முயற்சி அல்ல என்றும், கால நெருக்கடியால் முதல்வர் விடுத்த வேண்டுகோளுக்கு இணங்க எடுக்கப்பட்ட அவசர முடிவு என்றும் அவர் குறிப்பிட்டார்.
கட்சி நிர்வாகிகளின் மனநிலை
வாய்ப்பு மறுக்கப்பட்ட போதிலும், ஆளூர் ஷாநவாஸ் மற்றும் எஸ்.எஸ்.பாலாஜி ஆகியோர் கட்சித் தலைமையின் முடிவுக்குக் கட்டுப்படுவதாகத் தெரிவித்துள்ளனர். “கட்சியின் முடிவு எதுவாயினும் அதை ஏற்பதே அறம்” என ஷாநவாஸ் பெருந்தன்மையுடன் கூறியுள்ளார். அதே சமயம், பொதுத் தொகுதிகளில் போட்டியிடும்போது நிலவும் நெருக்கடிகளையும் அவர்கள் சுட்டிக்காட்டத் தவறவில்லை.
2026 தேர்தல் களம் எப்படி இருக்கும்?
திமுக கூட்டணியில் தொகுதிப் பங்கீடு சுமுகமாக முடிந்துள்ளதாகத் தோன்றினாலும், திருமாவளவனின் இந்த ‘ஆதங்கம்’ அடிமட்டத் தொண்டர்களிடையே எந்த மாதிரியான தாக்கத்தை ஏற்படுத்தும் என்பது கேள்விக்குறியே. “கேட்டது கிடைக்கவில்லை, கிடைத்தது போதும்” என்ற மனநிலையில் விசிக களம் காண்பது, தேர்தலின் வெற்றி வாய்ப்புகளை மாற்றியமைக்குமா என்பதைப் பொறுத்திருந்துதான் பார்க்க வேண்டும்.