மதுரை,ஜூன்.22; தமிழ்நாட்டில் அண்மையில் ஏற்பட்ட ஆட்சி மாற்றத்தைத் தொடர்ந்து, முந்தைய திமுக அரசால் கொண்டு வரப்பட்ட பல்வேறு திட்டங்களின் பெயர்கள் மாற்றம் செய்யப்பட்டு வருகின்றன. அந்த வகையில், பள்ளி மற்றும் கல்லூரி மாணவர்களின் எதிர்காலத்திற்காகத் தொடங்கப்பட்ட புகழ்பெற்ற ‘நான் முதல்வன்’ திட்டத்தின் பெயர் தற்போது ‘திறன் மேம்பாட்டு திட்டம்’ (Skill Development Scheme) என மாற்றப்பட்டுள்ளது.
இந்த அதிரடி பெயர் மாற்றம் அரசியல் வட்டாரத்தில் பெரும் விவாதத்தைக் கிளப்பியுள்ள நிலையில், இதற்கான காரணத்தை மாநில அமைச்சர் சி.டி.ஆர். நிர்மல் குமார் விளக்கியுள்ளார்.
மக்களுக்கு புரியவில்லை என்பதே காரணம்!
மதுரையில் நேற்று (ஜூன் 21, 2026) செய்தியாளர்களைச் சந்தித்த அமைச்சர் நிர்மல் குமார், இந்த பெயர் மாற்றத்திற்கான காரணம் குறித்துப் விளக்கினார். அவர், “நான் முதல்வன் திட்டம் என்று கூறினால் அது என்ன திட்டம் என்றே மக்களுக்குச் சரியாகப் புரிவதில்லை.
பொதுமக்களுக்கு எளிதில் விளங்கும் வகையில் இருக்க வேண்டும் என்பதற்காகவே இத்திட்டத்தின் பெயர் தற்போது ‘திறன் மேம்பாட்டு திட்டம்’ என மாற்றப்பட்டுள்ளது.”அரசின் திட்டங்கள் விளம்பர நோக்கத்திற்காக இல்லாமல், அதன் செயல்பாட்டை மக்கள் எளிதில் உணரும் வகையில் அமைய வேண்டும் என்ற நோக்கில் இந்த முடிவு எடுக்கப்பட்டுள்ளதாக அவர் குறிப்பிட்டார்.
திட்டம் முடக்கப்படுகிறதா? அமைச்சர் அளித்த பதில்
பெயர் மாற்றப்பட்டதால் இத்திட்டம் கைவிடப்படுகிறதோ என்ற அச்சம் மாணவர்கள் மற்றும் பெற்றோர்கள் மத்தியில் எழுந்தது. இதற்கு முற்றுப்புள்ளி வைக்கும் வகையில் அமைச்சர் நிர்மல் குமார் உறுதியளித்துள்ளார்.
திட்டம் தொடரும்: திட்டத்தின் பெயர் மட்டுமே மாற்றப்பட்டுள்ளதே தவிர, மாணவர்களுக்கான பயிற்சிகளோ அல்லது அதன் நோக்கங்களோ முடக்கப்படாது.
அதே பலன்கள்: கல்லூரி மாணவர்களுக்கான திறன் மேம்பாட்டுப் பயிற்சிகள், வேலைவாய்ப்பு முகாம்கள் மற்றும் போட்டித் தேர்வுக்கான ஊக்கத்தொகை வழங்கும் பணிகள் எவ்வித தடையுமின்றித் தொடர்ந்து செயல்படும்.
எந்த திட்டத்திற்கும் ஸ்டிக்கர் ஒட்டவில்லை: நிர்மல் குமார்
“எந்த திட்டத்திற்கும் ஸ்டிக்கர் ஒட்டவில்லை. ஒரு திட்டத்தின் பெயர் மக்களுக்கு புரியும்படி இருக்க வேண்டும். ‘நான் முதல்வன்’ என்றால் பலர் குழப்பமடைகின்றனர். ஏதோ முதலமைச்சரை தேர்வு செய்வதற்கான திட்டம் நடக்கிறதோ என்று நினைத்துக் கொள்கின்றனர்” என அவர் விளக்கமளித்தார்.
திறனை மேம்படுத்துவதுதான் இந்த திட்டத்தின் நோக்கம். எனவே அதற்கு ஏற்றவாறு ‘திறன் மேம்பாட்டு திட்டம்’ என பெயர் மாற்றம் செய்யப்பட்டுள்ளது. அந்த திட்டம் அப்படியே தொடர்கிறது என்றும் நிர்மல்குமார் கூறினார்.
சமூக ஊடக பக்கங்களிலும் மாற்றம்
பெயர் மாற்ற நடவடிக்கையின் ஒரு பகுதியாக, இத்திட்டத்தின் அதிகாரப்பூர்வ சமூக ஊடகப் பக்கங்களும் (எக்ஸ் தளம் – X Platform) ‘தமிழ்நாடு ஸ்கில் டெவலப்மென்ட் ஸ்கீம்’ என மாற்றியமைக்கப்பட்டுள்ளது. மேலும், கடந்த மே 15-ஆம் தேதிக்கு முன்பாக முந்தைய ஆட்சிக் காலத்தில் பதிவிடப்பட்ட புகைப்படங்கள் மற்றும் வீடியோக்கள் அனைத்தும் இந்த அதிகாரப்பூர்வ பக்கங்களில் இருந்து நீக்கப்பட்டு, புதிய பொலிவுடன் தற்போதைய தரவுகள் இணக்கப்பட்டு வருகின்றன.
அரசியல் ரீதியாக விமர்சனங்கள் எழுந்தாலும், மாணவர்களின் வேலைவாய்ப்பு மற்றும் தொழில்நுட்ப அறிவை வளர்க்கும் ஒரு முக்கியமான திட்டம் தொடர்ந்து செயல்படும் என்பது நிம்மதியளிக்கும் விஷயமாகும். பெயர் மாற்றத்தைக் கடந்து, ‘திறன் மேம்பாடு திட்டம்’ மூலம் அரசுப் பள்ளி மற்றும் கல்லூரி மாணவர்கள் உலகளாவிய வேலைவாய்ப்புகளுக்குத் தங்களை தொடர்ந்து தகுதிப்படுத்திக் கொள்ள அரசு முழு ஆதரவு வழங்கும் என எதிர்பார்க்கப்படுகிறது.