வாஷிங்டன்,மார்ச்.06; அர்ஜென்டினாவின் கால்பந்து ஜாம்பவான் லியோனல் மெஸ்ஸி, தனது இன்டர் மியாமி (Inter Miami) அணியினருடன் அமெரிக்க அதிபர் மாளிகையான வெள்ளை மாளிகைக்குச் சென்றார். 2025-ம் ஆண்டு எம்எல்எஸ் கோப்பையை (MLS Cup) வென்றதைக் கொண்டாடும் வகையில் அங்கு சிறப்பு விருந்து நடைபெற்றது.
மெஸ்ஸிக்கு டிரம்ப் அளித்த உற்சாக வரவேற்பு
வெள்ளை மாளிகையில் மெஸ்ஸியை வரவேற்ற அதிபர் டொனால்ட் டிரம்ப், அவரைப் புகழ்ந்து பேசினார். “எந்த ஒரு அமெரிக்க அதிபருக்கும் கிடைக்காத பெருமை இன்று எனக்கு கிடைத்துள்ளது; லியோனல் மெஸ்ஸியை வெள்ளை மாளிகைக்கு வரவேற்பதில் நான் பெருமகிழ்ச்சி அடைகிறேன்” என்று அவர் கூறினார்.
மெஸ்ஸியின் ஆட்டத்தைப் பாராட்டிய டிரம்ப், ஒரு கட்டத்தில் கால்பந்து உலகின் மாபெரும் வீரரான பீலேயுடன் (Pele) அவரை ஒப்பிட்டார். “நீங்கள் ஒருவேளை பீலேயை விட சிறந்தவராக இருக்கலாம்” என்று மெஸ்ஸியைப் பார்த்து டிரம்ப் கூறியது அங்கிருந்தவர்களிடையே பெரும் உற்சாகத்தை ஏற்படுத்தியது.
பரோன் டிரம்ப் மற்றும் கிறிஸ்டியானோ ரொனால்டோ
தனது மகன் பரோன் டிரம்ப் (Barron Trump) மெஸ்ஸியின் தீவிர ரசிகர் என்பதையும் டிரம்ப் வெளிப்படையாகக் கூறினார். மெஸ்ஸி ஒரு சிறந்த மனிதர் என்று தனது மகன் எப்போதும் கூறுவதாக அவர் குறிப்பிட்டார்.
மேலும், மெஸ்ஸியின் பரம எதிரி என வர்ணிக்கப்படும் கிறிஸ்டியானோ ரொனால்டோ (Cristiano Ronaldo) குறித்தும் டிரம்ப் பேசினார். “ரொனால்டோ ஒரு சிறந்த வீரர், அதேபோல் நீங்களும் (மெஸ்ஸி) சிறந்தவர்” என்று இரு ஜாம்பவான்களையும் சமமாகப் பாராட்டினார்.
சிறப்புப் பரிசுகள்
இந்த சந்திப்பின் போது, லியோனல் மெஸ்ஸி தனது கையொப்பமிட்ட ‘இன்டர் மியாமி’ கால்பந்தை டிரம்பிற்கு பரிசாக வழங்கினார். அணியின் உரிமையாளர் ஜார்ஜ் மாஸ் மற்றும் பயிற்சியாளர் ஜேவியர் மஷேரானோ ஆகியோர் டிரம்பிற்கு ஒரு சிறப்பு ஜெர்சி மற்றும் கைக்கடிகாரத்தைப் பரிசாக அளித்தனர்.
கால்பந்து உலகில் பேசுபொருளானது மெஸ்ஸி-டிரம்ப் சந்திப்பு!
2026ஆம் ஆண்டு உலகக் கோப்பை போட்டி அமெரிக்கா, மெக்சிகோ, கனடா ஆகிய 3 நாடுகளில் நடைபெறவிருக்கும் சூழலில், மெஸ்ஸி மற்றும் டிரம்ப் இடையிலான இந்தச் சந்திப்பு கால்பந்து ரசிகர்களிடையே பேசுபொருளாகியுள்ளது. உலகின் சிறந்த வீரர் யார் என்ற விவாதத்திற்கு டிரம்ப் தனது பாணியில் ஒரு புதிய கோணத்தைக் கொடுத்துள்ளார்.