சென்னை,மே.14; தமிழ்நாட்டில் ஆட்சி மாற்றம் ஏற்பட்டுள்ள நிலையில், இல்லத்தரசிகள் ஆவலோடு எதிர்பார்த்துக் கொண்டிருந்த ‘கலைஞர் மகளிர் உரிமைத்தொகை’ குறித்த மிக முக்கியமான தகவலை முதலமைச்சர் விஜய் இன்று (மே 14, 2026) வெளியிட்டுள்ளார்.
மகளிர் உரிமைத்தொகை: இதுவரை நடந்தது என்ன?
தமிழ்நாட்டில் கடந்த திமுக ஆட்சிக் காலத்தில் முன்னாள் முதலமைச்சர் மு.க. ஸ்டாலினால் 2023-ம் ஆண்டு மார்ச் மாதம் இந்தத் திட்டம் தொடங்கப்பட்டது. தொடக்கத்தில் சுமார் 1.13 கோடி பெண்களுக்கு மாதம் ரூ.1,000 வழங்கப்பட்டு வந்தது. பின்னர் இது 1.31 கோடி பயனாளர்களாக உயர்த்தப்பட்டது. தேர்தலைக் காரணம் காட்டி முன்கூட்டியே 3 மாதங்களுக்கான மகளிர் உரிமைத் தொகை ரூ.3,000 மற்றும் கோடைக்கால சிறப்புத் தொகையாக தேர்தல் காலத்தின் போது, சிறப்புத் தொகையாக ரூ. 2,000 என மொத்தம் ரூ. 5,000-ஐ மகளிர் உரிமைத்தொகை பெறும் பெண்களின் வங்கிக் கணக்கில் தமிழ்நாடு அரசு வரவு வைத்தது.
தேர்தல் வாக்குறுதியும் தற்போதைய நிலையும்
தற்போது முதலமைச்சராகப் பொறுப்பேற்றுள்ள தமிழக வெற்றிக் கழகத்தின் தலைவர் விஜய், தனது தேர்தல் பரப்புரையின் போது மகளிர் உரிமைத்தொகையை ரூ.2,500 ஆக உயர்த்தி வழங்குவதாக வாக்குறுதி அளித்திருந்தார். இதனால் மே மாதத்திற்கான தொகை ரூ.1,000 வருமா அல்லது ரூ.2,500 ஆக உயர்த்தி வழங்கப்படுமா என்ற எதிர்பார்ப்பு மக்கள் மத்தியில் நிலவி வருகிறது.
முதலமைச்சர் விஜய்யின் அதிகாரப்பூர்வ அறிவிப்பு
தற்போதைய சூழல் குறித்து அறிக்கை வெளியிட்டுள்ள முதலமைச்சர் விஜய், “பெண்களுக்கு மாதந்தோறும் வழங்கப்பட்டு வரும் மகளிர் உரிமைத்தொகை திட்டத்தினை மறுசீரமைப்பு செய்ய அரசுக்கு கூடுதல் கால அவகாசம் தேவைப்படுகிறது. எனவே, மே 2026 மாதத்திற்கான கலைஞர் மகளிர் உரிமைத் தொகை ரூ.1,000 பயனாளிகளின் வங்கிக் கணக்கில் விரைவில் நேரடியாக வரவு வைக்கப்படும்” என்று தெரிவித்துள்ளார்.
திட்டத்தை செம்மைப்படுத்தவும், தகுதியான பயனாளர்களை முறையாக வகைப்படுத்தவும் இந்த அவகாசம் தேவைப்படுவதாக அரசுத் தரப்பில் விளக்கம் அளிக்கப்பட்டுள்ளது.
எப்போது வங்கிக் கணக்கில் பணம் ஏறும்?
வழக்கமாக ஒவ்வொரு மாதமும் 15-ம் தேதிக்குள் பணம் வரவு வைக்கப்படும். தற்போது இதற்கான நிர்வாகப் பணிகள் துரிதப்படுத்தப்பட்டுள்ளதால், இன்னும் சில தினங்களில் இல்லத்தரசிகளின் வங்கிக் கணக்கிற்கு இந்தத் தொகை சென்றடையும் என்று எதிர்பார்க்கப்படுகிறது.
புதிய அரசு பொறுப்பேற்ற பிறகு மகளிர் உரிமைத்தொகை கிடைக்குமா என்ற ஐயப்பாட்டில் இருந்த பெண்களுக்கு, முதலமைச்சரின் இந்த அறிவிப்பு பெரும் நிம்மதியைத் தந்துள்ளதாக அரசியல் பார்வையாளர்கள் கருதுகின்றனர். வாக்குறுதி அளித்தபடி ரூ.2,500 ஆக உயர்த்தப்படுவது குறித்த அறிவிப்பு எப்போது வெளியாகும் என எதிர்பார்க்கப்படுகிறது.