சென்னை, நந்தனம் அரசு கலைக் கல்லூரியில் பயிலும் 300-க்கும் மேற்பட்ட மாணவர்கள், சமீபத்தில் திறக்கப்பட்ட எம்.சி. ராஜா விடுதியில் நிலவும் மோசமான அடிப்படை வசதிகளைக் கண்டித்து சமீபத்தில் இரவு உள்ளிருப்புப் போராட்டத்தில் ஈடுபட்டனர். ஆதி திராவிடர் மற்றும் பழங்குடியின உயர் கல்வி மாணவர்களுக்குச் சிறந்த வாழ்க்கைச் சூழலை வழங்குவதற்காக, ரூ.44.40 கோடி செலவில் இந்த விடுதி ஏப்ரல் 14 அன்று முதல்வர் மு.க. ஸ்டாலினால் திறந்து வைக்கப்பட்டது.
தற்போது, பழைய மற்றும் புதிய விடுதிகளில் 900-க்கும் மேற்பட்ட மாணவர்கள் தங்கி உள்ளனர். ஆனால், புதிய விடுதி திறக்கப்பட்டும், அடிப்படை வசதிக் குறைபாடுகள் நீடித்து வருவதாக மாணவர்கள் குற்றம் சாட்டுகின்றனர். கடந்த சில மாதங்களாக, விடுதியில் வழங்கப்படும் உணவில் புழுக்கள் மற்றும் சிறிய கண்ணாடித் துகள்கள் இருப்பதாகவும், இது பல மாணவர்களை வெளியிலிருந்து உணவு உண்ணும்படி கட்டாயப்படுத்துவதாகவும் அவர்கள் தெரிவித்தனர். மேலும், ஒவ்வொரு தளத்திலும் உள்ள துணி துவைக்கும் அறைகளுக்கு (Washing Room) முறையான தண்ணீர்க் குழாய் இணைப்பு வசதி இல்லாததும் ஒரு முக்கியப் பிரச்சினையாக உள்ளது.
தரமற்ற உணவு மற்றும் அச்சுறுத்தல்கள்
“வழங்கப்படும் உணவின் தரம் மிகவும் மோசமாக இருப்பதால், நான் வெளியிலிருந்து சாப்பிட வேண்டியுள்ளது. ஆனால், வெளியிலிருந்து சாப்பிட முடியாத ஏழை மாணவர்கள் அதே உணவைச் சாப்பிட வேண்டிய அவல நிலை உள்ளது,” என்று எம்.சி. ராஜா விடுதி மாணவர் ஒருவர் வேதனை தெரிவித்தார்.
மாணவர்கள் குறிப்பிட்டுள்ள மற்ற குறைகள் என்ன?
பழைய விடுதியில் உள்ள 12 கழிவறைகளில் பூட்டுகள் உள்ளது வெறும் இரண்டில் மட்டுமே. இதனால் பல மாணவர்கள் அந்த இரண்டு கழிவறைகளை மட்டுமே பயன்படுத்த வேண்டியுள்ளது.
புதிய விடுதியில் முதலுதவிப் பெட்டி இல்லை எனப்புகார்
கல்லூரி நேரத்திற்குப் பிறகு, மாணவர்கள் அதிக நேரம் விடுதியில்தான் செலவிடுகின்றனர். விளையாடுவதற்குத் தேவையான உபகரணங்கள் மற்றும் விளையாட்டு மைதானம் போன்ற வசதிகள் இல்லை. தனிப்பட்ட முறையில் அடிப்படைத் தேவைகள் குறித்து புகார் அளிக்க வரும் மாணவர்களை விடுதி காப்பாளர் அச்சுறுத்துவதாகவும் மாணவர்கள் புகார் தெரிவித்தனர்.
அதிகாரிகளின் உறுதிமொழியைத் தொடர்ந்து போராட்டம் வாபஸ்
அகில இந்திய மாணவர் சம்மேளனம் (AISF) தென் சென்னை மாவட்டச் செயலாளர் ஏ. மணிகண்டன் தலைமையில் உள்ளிருப்புப் போராட்டம் இரண்டு மணி நேரம் நீடித்தது. ஆரம்பத்தில் சுமார் 100 மாணவர்கள் மட்டுமே போராட்டத்தில் ஈடுபட்ட நிலையில், மேலும் பலர் இணைந்தனர்.
“புதிய மற்றும் பழைய விடுதிகளில் அடிப்படை வசதிகளை நிறைவேற்றுமாறு 12 கோரிக்கைகளுடன் கூடிய கடிதத்தை நான்கு மாதங்களுக்கு முன்பே மாவட்ட ஆட்சியரிடம் சமர்ப்பித்தோம். இருப்பினும், எங்கள் கோரிக்கைகள் எதுவும் நிறைவேற்றப்படவில்லை. அதனால்தான் போராட்டத்தில் ஈடுபட்டோம்,” என ஒரு மாணவர் தெரிவித்தார்.
புதிய விடுதியில் தொடரும் பழைய பிரச்சினைகள்
போராட்டம் குறித்து விடுதி காப்பாளர் அழகுராஜாவிடம் கேட்டபோது, “இது ஒரு புதிய விடுதி. உணவு அனைத்தும் ஒப்பந்ததாரர்களால் தயாரிக்கப்படுகிறது. எம்.சி. ராஜா விடுதியில் உணவு மற்றும் பிற அடிப்படை வசதிகள் தொடர்பாக எந்தப் பிரச்சினையும் எழவில்லை,”
என்று மறுத்தார்.
இருப்பினும், சென்னை மாவட்ட ஆதி திராவிடர் நல அலுவலர் வெற்றிக்குமார் சம்பவ இடத்திற்கு வந்து, மாணவர்களின் கோரிக்கைகள் நிறைவேற்றப்படும் என உறுதி அளித்ததைத் தொடர்ந்து, மாணவர்கள் தங்கள் உள்ளிருப்புப் போராட்டத்தை திரும்பப் பெற்றனர்.