மேற்கு வங்கத் தேர்தல்; முதற்கட்ட வாக்குப்பதிவு தொடக்கம் – காலை முதலே வாக்காளர்கள் மிகுந்த ஆர்வம்!

கொல்கத்தா, ஏப்.23;: மேற்கு வங்க சட்டப்பேரவைத் தேர்தலுக்கான முதற்கட்ட வாக்குப்பதிவு இன்று (ஏப்ரல் 23, 2026) காலை 7 மணிக்குத் தொடங்கியது. வாக்குப்பதிவு தொடங்கியது முதலே வாக்காளர்கள் நீண்ட வரிசையில் காத்திருந்து வாக்களித்து வருவதைக் காண முடிகிறது.

முதற்கட்ட தேர்தலின் முக்கிய அம்சங்கள்

294 தொகுதிகளைக் கொண்ட மேற்கு வங்க சட்டப்பேரவைக்கு இரண்டு கட்டங்களாக தேர்தல் நடைபெறுகிறது. அதன்படி முதற்கட்டமாக இன்று 152 தொகுதிகளுக்கு தேர்தல் நடைபெறுகிறது
இன்றைய முதற்கட்ட வாக்குப்பதிவில் சுமார் 3.6 கோடி வாக்காளர்கள் வாக்களிக்க தகுதி பெற்றுள்ளனர். இதில் மேற்கு வங்கத்தின் வட பகுதியில் உள்ள 8 மாவட்டங்கள் மற்றும் தெற்கு வங்கத்தின் 8 மாவட்டங்கள் என மொத்தம் 16 மாவட்டங்களில் உள்ள 152 தொகுதிகள் அடங்கும்.

முதற்கட்டத் தேர்தலில் நட்சத்திர தொகுதிகள் அடங்கும்

வேட்பாளர்கள்: மொத்தம் 1,452 வேட்பாளர்கள் களத்தில் உள்ளனர்.

பாதுகாப்பு: அமைதியான முறையில் தேர்தல் நடைபெறுவதை உறுதி செய்ய சுமார் 2,450 கம்பெனி மத்திய பாதுகாப்புப் படையினர் (சுமார் 2.5 லட்சம் வீரர்கள்) குவிக்கப்பட்டுள்ளனர்.

முக்கிய தொகுதிகள்: நந்திகிராம், டார்ஜிலிங், சிலிகுரி மற்றும் கூச் பெஹார் போன்ற நட்சத்திரத் தொகுதிகள் இன்றைய தேர்தலில் அடங்கும்.

நந்திகிராம்: மீண்டும் ஒரு அரசியல் போர்க்களம்

கடந்த தேர்தலைப் போலவே, இம்முறையும் நந்திகிராம் தொகுதி அனைவரின் கவனத்தையும் ஈர்த்துள்ளது. பாஜகவின் சுவேந்து அதிகாரியும், திரிணாமுல் காங்கிரஸின் பவித்ரா கர்ரும் இங்கு மோதுகின்றனர். சுவேந்து அதிகாரி இம்முறை பவானிபூர் தொகுதியிலும் மம்தா பானர்ஜிக்கு எதிராகப் போட்டியிடுகிறார் என்பது குறிப்பிடத்தக்கது.

தேர்தல் களம்: மோடி மற்றும் மம்தாவின் சவால்

நான்காவது முறையாக ஆட்சியைத் தக்கவைக்க மம்தா பானர்ஜி தீவிரமாகப் போராடி வரும் நிலையில், வங்க மண்ணில் முதல்முறையாக தாமரையை மலர வைக்கப் பிரதமர் மோடி தலைமையிலான பாஜக தீவிரப் பிரப்புரை மேற்கொண்டு வருகிறது. வாக்காளர் பட்டியலில் இருந்து சுமார் 91 லட்சம் பெயர்கள் நீக்கப்பட்டது தொடர்பாக இரு கட்சிகளுக்கும் இடையே கடும் மோதல் நிலவி வருகிறது.

142 தொகுதிகளுக்கு வரும் 29ஆம் தேதி வாக்குப்பதிவு

இன்றைய முதற்கட்ட தேர்தலைத் தொடர்ந்து, மீதமுள்ள 142 தொகுதிகளுக்கு வரும் 29-ஆம் தேதி இரண்டாம் கட்ட வாக்குப்பதிவு நடைபெற உள்ளது. வாக்கு எண்ணிக்கை மே 4-ஆம் தேதி நடைபெற்று அன்றே முடிவுகள் அறிவிக்கப்படும்.

மேற்கு வங்க அரசியலில் இந்தத் தேர்தல் ஒரு திருப்புமுனையாக அமையும் என எதிர்பார்க்கப்படுகிறது. வடக்கு வங்கத்தில் தனது பிடியை வலுப்படுத்த பாஜக முயற்சிக்கும் அதேவேளையில், தனது கோட்டையைக் காக்க மம்தா பானர்ஜி வியூகங்களை வகுத்துள்ளார். மக்களின் தீர்ப்பு யாருக்கு சாதகமாக இருக்கும் என்பது மே 4-ல் தெரிந்துவிடும்.