சென்னை,ஏப்.19; திமுக தலைவரும் தமிழ்நாடு முதலமைச்சருமான மு.க. ஸ்டாலின், சென்னையை உலகத்தரம் வாய்ந்த நகரமாக மாற்றும் நோக்கில் ‘சென்னை சூப்பர் 6’ (Chennai Super 6) என்ற ஆறு முக்கிய வாக்குறுதிகளை வெளியிட்டுள்ளார். 2026 சட்டப்பேரவைத் தேர்தலை முன்னிட்டு அறிவிக்கப்பட்டுள்ள இந்தத் திட்டங்கள், சென்னையின் உட்கட்டமைப்பு, போக்குவரத்து மற்றும் தொழில்நுட்ப வளர்ச்சியை அடுத்த கட்டத்திற்கு கொண்டு செல்லும் என எதிர்பார்க்கப்படுகிறது.
- மேம்படுத்தப்பட்ட பொது வசதிகள்
சென்னை மாநகரின் அடுக்குமாடிக் குடியிருப்புகளில் வசிக்கும் மக்களின் வாழ்க்கைத்தரத்தை உயர்த்த, குடியிருப்போர் நல மகளிர் சங்கங்கள் மூலம் அரசு நிதியுதவியுடன் பொது வசதிகள் மேம்படுத்தப்படும். குறிப்பாக, மெட்ரோ குடிநீர் வசதி இல்லாத இடங்களுக்கு RO சுத்திகரிக்கப்பட்ட குடிநீரும், மற்ற இடங்களுக்குச் சீரான குடிநீர் விநியோகமும் உறுதி செய்யப்படும். மேலும், நகர் முழுவதும் அதிநவீன தெருவிளக்குகள் மற்றும் உலகத்தரம் வாய்ந்த பண்பாட்டு மையம் அமைக்கப்படும். - போக்குவரத்து புரட்சி: 1,000 புதிய மினி பேருந்துகள்
சென்னையின் போக்குவரத்து நெரிசலைக் குறைக்கவும், கடைசி மைல் இணைப்பை (Last-mile connectivity) உறுதி செய்யவும் 1,000 புதிய சிற்றுந்துகள் இயக்கப்படும். இவை மெட்ரோ மற்றும் ரயில் நிலையங்களை குடியிருப்புப் பகுதிகளுடன் இணைக்கும். மேலும், செயற்கை நுண்ணறிவு (AI) தொழில்நுட்பத்தைப் பயன்படுத்திப் போக்குவரத்து மேலாண்மை செய்யப்பட்டு, பயண நேரம் 25% வரை குறைக்கப்படும். - காலக்கெடுவுக்குள் உட்கட்டமைப்புத் திட்டங்கள்
சென்னையின் முக்கிய திட்டங்கள் அனைத்தும் குறிப்பிட்ட காலத்திற்குள் முடிக்கப்படும் என அறிவிக்கப்பட்டுள்ளது:
சென்னை எல்லைச் சாலை திட்டம்: 2027-க்குள்.
மெட்ரோ விரிவாக்கம் மற்றும் மழைநீர் வடிகால்: 2028-க்குள்.
உலகத்தர சாலைகள்: 2029-க்குள் அகலமான நடைபாதைகளுடன் அமைக்கப்படும்.
- தெரு நாய்கள் பிரச்னைக்கு மனிதாபிமானத் தீர்வு
சென்னையில் நீண்ட நாட்களாக இருக்கும் தெரு நாய்கள் பிரச்னைக்கு அறிவியல் பூர்வமான தீர்வு காணப்படும். விலங்குகள் பிறப்புக் கட்டுப்பாட்டு (ABC) திட்டத்தின் கீழ் மருத்துவர்கள் மற்றும் பணியாளர்களின் எண்ணிக்கை மும்மடங்காக அதிகரிக்கப்படும். தன்னார்வத் தொண்டு நிறுவனங்களுடன் இணைந்து பிரத்யேகக் காப்பகங்கள் உருவாக்கப்படும். - ரூ. 10,000 கோடி முதலீட்டில் உலகளாவிய சிறப்பு மையம்
தொழில்நுட்ப வளர்ச்சியில் சென்னையை முன்னிறுத்த AI, அனிமேஷன் (Animation), மற்றும் கேமிங் (Gaming) துறைகளுக்காகத் தனி சிறப்பு மையம் அமைக்கப்படும். இதன் மூலம் சுமார் 20,000 பேருக்கு உயர் ஊதியத்துடன் கூடிய வேலைவாய்ப்புகள் உருவாக்கப்படும். - உலகளாவிய திறமைத் தளம் (Global Talent Gateway)
தமிழ்நாடு இளைஞர்களின் திறனை உலகத்தரம் வாய்ந்ததாக மாற்ற ‘Global Talent Gateway’ உருவாக்கப்படும். இது உயர்தரத் திறன் மேம்பாட்டுப் பயிற்சி, ஆராய்ச்சி மையங்கள் மற்றும் அதிக வருமானம் ஈட்டும் வேலைவாய்ப்புகளை வழங்குவதை நோக்கமாகக் கொண்டுள்ளது.
முதலமைச்சர் மு.க. ஸ்டாலினின் இந்த ‘சென்னை சூப்பர் 6’ வாக்குறுதிகள் வெறும் அறிவிப்புகள் மட்டுமல்லாது, சென்னையை ஒரு சர்வதேசத் தரத்திலான மெகா சிட்டியாக (Mega City) மாற்றுவதற்கான ஒரு தொலைநோக்குப் பார்வையாகும் என்று திமுக கூறுகிறது. திமுக மீண்டும் ஆட்சிக்கு வந்து இத்திட்டங்கள் சரியாகச் செயல்படுத்தப்பட்டால், சென்னையின் உட்கட்டமைப்பும் பொருளாதாரமும் பெரும் எழுச்சியைக் காணும் என்பதில் ஐயமில்லை.