வருமான வரி அபராத வழக்கு: சென்னை உயர் நீதிமன்றத்தில் நடிகர் விஜய் மேல்முறையீடு!

சென்னை,ஏப்.13; தமிழ்நாடு அரசியல் மற்றும் திரைத்துறையில் பெரும் பரபரப்பை ஏற்படுத்தியுள்ள நடிகர் விஜய்யின் வருமான வரி தொடர்பான வழக்கில் புதிய திருப்பம் ஏற்பட்டுள்ளது. வருமான வரித்துறை விதித்த ரூ.1.50 கோடி அபராதத்தை உறுதி செய்த தனி நீதிபதியின் தீர்ப்பை எதிர்த்து, விஜய் தற்போது சென்னை உயர் நீதிமன்றத்தில் மேல்முறையீடு செய்துள்ளார்.

பின்னணி என்ன?

கடந்த 2015-16ஆம் நிதியாண்டிற்கான வருமான வரி கணக்கை தாக்கல் செய்தபோது, நடிகர் விஜய் தனது வருமானம் சுமார் ரூ.35.42 கோடி என குறிப்பிட்டிருந்தார். ஆனால், 2015-ல் அவர் வீட்டில் நடத்தப்பட்ட வருமான வரி சோதனையின் போது கைப்பற்றப்பட்ட ஆவணங்களை ஆய்வு செய்த அதிகாரிகள், ‘புலி’ திரைப்படத்திற்காக அவர் பெற்ற ரூ.15 கோடி வருமானத்தை கணக்கில் காட்டவில்லை என்பதைக் கண்டறிந்தனர்.

ரூ.1.50 கோடி அபராதம்

வருமானத்தை மறைத்ததாகக் கூறி, வருமான வரித்துறை கடந்த 2022-ஆம் ஆண்டு ஜூன் மாதம் விஜய்க்கு ரூ.1.50 கோடி அபராதம் விதித்து உத்தரவிட்டது. இந்த உத்தரவை எதிர்த்து விஜய் தரப்பில் சென்னை உயர் நீதிமன்றத்தில் வழக்கு தொடரப்பட்டது. குறிப்பாக, இந்த அபராத உத்தரவு காலதாமதமாகப் பிறப்பிக்கப்பட்டதாக விஜய் தரப்பு வாதிட்டது.

தனி நீதிபதியின் தீர்ப்பு

இந்த வழக்கை விசாரித்த நீதிபதி செந்தில்குமார் ராமமூர்த்தி, கடந்த பிப்ரவரி மாதம் தீர்ப்பளித்தார். அதில், வருமான வரித்துறை விதித்த அபராதம் சட்டப்படி சரியானது என்றும், காலதாமதம் ஏற்படவில்லை என்றும் கூறி விஜய்யின் மனுவைத் தள்ளுபடி செய்தார். மேலும், மேல்முறையீடு செய்ய அனுமதியளித்த நீதிபதி, காலதாமதத்தைக் காரணம் காட்டாமல் மற்ற காரணங்களுக்காக மேல்முறையீடு செய்யலாம் என அறிவுறுத்தினார்.

இரு நீதிபதிகள் அமர்வில் மேல்முறையீடு

தற்போது, தமிழக வெற்றிக் கழகத்தின் தலைவராக அரசியல் பயணத்தைத் தொடங்கியுள்ள விஜய், தனி நீதிபதியின் இந்த உத்தரவை எதிர்த்து சென்னை உயர் நீதிமன்றத்தில் இரு நீதிபதிகள் கொண்ட அமர்வில் மேல்முறையீடு செய்துள்ளார். இந்த மனு விரைவில் விசாரணைக்கு வர உள்ளது.

வருமான வரி வழக்கு விஜய்க்கு சட்டரீதியான சவால்

2026 சட்டப்பேரவைத் தேர்தலை நோக்கித் தீவிரமாகப் பணியாற்றி வரும் நடிகர் விஜய்க்கு, இந்த வருமான வரி வழக்கு சட்டரீதியான சவாலாக அமைந்துள்ளது. மேல்முறையீட்டு மனுவில் நீதிமன்றம் எடுக்கப்போகும் முடிவு, அவரது ரசிகர்களிடமும் அரசியல் வட்டாரத்திலும் பெரும் எதிர்பார்ப்பை ஏற்படுத்தியுள்ளது. சட்டப் போராட்டத்தின் அடுத்த கட்டத்தை சென்னை உயர் நீதிமன்றம் விரைவில் தீர்மானிக்கும்.