டெல்லி,மே.22; இந்தியாவின் முன்னணி மல்யுத்த வீராங்கனையான வினேஷ் போகத் (Vinesh Phogat), உள்நாட்டுப் போட்டிகளில் பங்கேற்க தகுதியற்றவர் என இந்திய மல்யுத்த கூட்டமைப்பு (WFI) அறிவித்திருந்த முடிவிற்கு டெல்லி உயர் நீதிமன்றம் இன்று (மே 22, 2026) கடும் கண்டனம் தெரிவித்துள்ளது.
மேலும், இந்த விவகாரத்தில் மத்திய அரசு உடனடியாக தலையிட்டு, நிபுணர் குழு ஒன்றை அமைத்து வினேஷ் போகத்தின் நிலையை மறுஆய்வு செய்ய வேண்டும் என்றும், அவர் ஆசிய விளையாட்டுப் போட்டிகளுக்கான (Asian Games) தகுதிச் சுற்றில் பங்கேற்பதை உறுதி செய்ய வேண்டும் என்றும் வாய்மொழியாக உத்தரவிட்டுள்ளது.
தாய்மை என்பது போற்றத்தக்கது, தண்டனைக்குரியதல்ல: நீதிமன்றம் கருத்து
தலைமை நீதிபதி டி.கே. உபாத்யாயா மற்றும் நீதிபதி தேஜஸ் காரியா ஆகியோர் அடங்கிய அமர்வு இந்த வழக்கைத் விசாரித்தது. மகப்பேறு விடுப்புக்குப் பிறகு மீண்டும் விளையாட்டிற்குள் களமிறங்க முயற்சிக்கும் ஒரு வீராங்கனையை கூட்டமைப்பு இவ்வாறு நடத்துவது முறையல்ல என்று நீதிபதிகள் சுட்டிக்காட்டினர்.
“நமது நாட்டில் தாய்மை (Motherhood) என்பது கொண்டாடப்பட வேண்டிய ஒன்று. அது ஒரு வீராங்கனையின் வாழ்க்கைக்குப் பின்னடைவாக மாறக் கூடாது” என்று நீதிமன்றம் குறிப்பிட்டது. மேலும், “தனிப்பட்ட பகை அல்லது மோதல்கள் எதுவாக இருந்தாலும், அதற்காக மல்யுத்த விளையாட்டு ஏன் பாதிக்கப்பட வேண்டும்? கூட்டமைப்பு பழிவாங்கும் உணர்ச்சியுடன் செயல்படக் கூடாது” என்றும் நீதிபதிகள் எச்சரித்தனர்.
விதிகளில் திடீர் மாற்றம் ஏன்? – நீதிமன்றம் கேள்வி
கடந்த 18ஆம் தேதியன்று தனி நீதிபதி வழங்கிய இடைக்கால நிவாரண மறுப்பு உத்தரவை எதிர்த்து வினேஷ் போகத் மேல்முறையீடு செய்திருந்தார். இந்த விசாரணையின் போது, முந்தைய நடைமுறைகளைத் தவிர்த்துவிட்டு, தகுதியான மற்றும் புகழ்பெற்ற வீராங்கனைகளை உள்நாட்டுப் போட்டிகளில் விளையாட அனுமதிக்காமல் கூட்டமைப்பு விதிகளை மாற்றியிருப்பது பல சந்தேகங்களை எழுப்புகிறது என்று நீதிமன்றம் கூறியது.
விளையாட்டுத் துறை அதிகார அமைப்பின் (SAI) விதிகளின்படி, சிறப்புச் சூழல்களில் தகுதி விதிகளில் தளர்வுகள் அளிக்கப்பட வழிவகை உள்ளது என மத்திய அரசு தரப்பு வழக்கறிஞர் நீதிமன்றத்தில் தெரிவித்தார். இதனைத் தொடர்ந்து, வினேஷ் போகத்தின் உடல் தகுதி மற்றும் வாய்ப்புகளை ஆய்வு செய்ய விளையாட்டு நிபுணர்கள் அடங்கிய குழுவை உடனே அமைக்குமாறு மத்திய அரசுக்கு நீதிமன்றம் உத்தரவிட்டது.
பின்னணி என்ன?
2024 பாரிஸ் ஒலிம்பிக் மல்யுத்தத்தில் 50 கிலோ எடைப்பிரிவின் இறுதிப் போட்டிக்கு முன்னேறிய வினேஷ் போகத், காலையில் நடந்த எடை பரிசோதனையின்போது அனுமதிக்கப்பட்ட எடையை விட 100 கிராம் கூடுதலாக இருந்ததால் தகுதி நீக்கம் செய்யப்பட்டார். அதைத் தொடர்ந்து அவர் தனது ஓய்வை அறிவித்தார். பின்னர், ஜூலை 2025-இல் அவருக்கு ஆண் குழந்தை பிறந்தது. மகப்பேறு இடைவேளைக்குப் பிறகு, டிசம்பர் 2025-இல் தனது ஓய்வு முடிவை அவர் திரும்பப் பெற்றார்.
ஒரு விதியை காட்டி வினேஷ் போகத்திற்கு தடை விதித்த மல்யுத்த கூட்டமைப்பு
ஆனால், ஓய்விலிருந்து திரும்பும் வீரர்கள் 6 மாத கால அவகாச அறிவிப்பை முன்கூட்டியே சமர்ப்பிக்க வேண்டும் என்ற ஊக்கமருந்து தடுப்பு விதியைக் காரணம் காட்டி, அடுத்த மாதம் (ஜூன், 2026) வரை உள்நாட்டுப் போட்டிகளில் விளையாட வினேஷ் போகத்திற்கு இந்திய மல்யுத்த கூட்டமைப்பு தடை விதித்தது. மே 30 மற்றும் 31 ஆகிய தேதிகளில் நடைபெறவுள்ள ஆசிய விளையாட்டுப் போட்டிகளுக்கான தகுதிச் சுற்றில் அவர் பங்கேற்பதைத் தடுக்கும் நோக்கிலேயே கூட்டமைப்பு திட்டமிட்டு விதிகளை மாற்றியுள்ளதாக வினேஷ் போகத் தரப்பு வாதிட்டது.
நிர்வாகச் சிக்கல்களை வெளிச்சம்போட்டு காட்டிய நீதிமன்றம்
டெல்லி உயர் நீதிமன்றத்தின் இந்த தலையீடு, இந்தியாவின் விளையாட்டுத் துறையில் உள்ள நிர்வாகச் சிக்கல்களையும் பழிவாங்கும் அரசியலையும் வெளிச்சமிட்டுக் காட்டியுள்ளது. திறமையான வீராங்கனைகள் தங்களது தனிப்பட்ட வாழ்வியல் மாற்றங்களான தாய்மை போன்ற காரணங்களால் புறக்கணிக்கப்படக் கூடாது என்பதை நீதிமன்றம் மிக அழுத்தமாகப் பதிவு செய்துள்ளது. மே மாத இறுதியில் நடைபெறவிருக்கும் ஆசிய விளையாட்டு தகுதிச் சுற்றில் வினேஷ் போகத் பங்கேற்பதற்கான கதவுகள் தற்போது நீதிமன்ற உத்தரவின் மூலம் மீண்டும் திறக்கப்பட்டுள்ளன.