ஹார்முஸ் நீரிணையில் பரபரப்பு: இந்திய எண்ணெய்க் கப்பலை மறித்த ஈரான் கடற்படை – “உடனடியாகத் திரும்புங்கள்” என எச்சரிக்கை!

டெஹ்ரான்,ஏப்.19; மத்திய கிழக்கில் நிலவி வரும் பதற்றமான சூழ்நிலைக்கு மத்தியில், ஹார்முஸ் நீரிணை (Strait of Hormuz) வழியாகச் செல்ல முயன்ற இந்தியக் கொடி ஏந்திய எண்ணெய்க் கப்பல்களை ஈரான் கடற்படை தடுத்து நிறுத்தியுள்ளது. இந்தச் சம்பவம் தொடர்பான வீடியோ சமூக வலைதளங்களில் வெளியாகி பெரும் பரபரப்பை ஏற்படுத்தியுள்ளது.

இந்தியக் கப்பல்களுக்கு அனுமதி மறுப்பு

ஈரான் தனது கடல் எல்லையை மூடுவதாக அறிவித்ததைத் தொடர்ந்து, ஹார்முஸ் நீரிணை வழியாகப் பயணிக்க முயன்ற ‘பாக்கிய லட்சுமி’ (Bhagya Lakshmi) மற்றும் ‘சன்மார் ஹெரால்டு’ (Sanmar Herald) ஆகிய இரண்டு இந்தியக் கப்பல்கள் திருப்பி அனுப்பப்பட்டன. ஈரானிய புரட்சிகர பாதுகாப்புப் படை (IRGC) இந்தக் கப்பல்களை வழிமறித்து, உடனடியாகத் திரும்பிச் செல்லுமாறு வானொலி மூலம் கட்டளையிட்டது.

“உடனடியாகத் திரும்புங்கள்”: ஈரானின் கடும் எச்சரிக்கை

இதுதொடர்பாக வெளியான வீடியோவில், இந்தியக் கப்பலின் ஊழியர்கள் ஈரான் கடற்படையுடன் தொடர்புகொண்டு அனுமதி கோருவது கேட்கிறது. “ஈரான் கடற்படையே, நான் பேசுவது பாக்கிய லட்சுமி கப்பல், உங்கள் செய்தி தெளிவாகக் கேட்கிறது” என்று ஊழியர் கூறுகிறார்.

அதற்குப் பதிலளித்த ஈரான் கடற்படை, “உடனடியாகத் திரும்புங்கள்” (Turn around immediately) என்று கட்டளையிட்டது. இதனை ஏற்று அந்தக் கப்பல் தனது பயணப் பாதையை மாற்றிக்கொண்டது. மற்றொரு கப்பலான சன்மார் ஹெரால்டு, தங்களுக்கு ஏற்கனவே அனுமதி வழங்கப்பட்டதாகவும், ஆனால் தற்போது துப்பாக்கிச் சூடு நடத்தப்படுவதாகவும் கூறி அபயக்குரல் (Distress Call) எழுப்பியது.

இருப்பினும், எவருக்கும் காயம் ஏற்படவில்லை என்றும் கப்பல்களுக்குச் சேதம் இல்லை என்றும் தகவல்கள் தெரிவிக்கின்றன.

இந்தியாவின் கவலை மற்றும் வெளியுறவுத்துறை நடவடிக்கை

இந்தச் சம்பவம் குறித்து இந்திய வெளியுறவு அமைச்சகம் (MEA) தனது கவலையைத் தெரிவித்துள்ளது. இந்தியக் கப்பல்கள் மற்றும் மாலுமிகளின் பாதுகாப்பை உறுதி செய்ய வேண்டும் என்று ஈரான் தூதரிடம் வெளியுறவுச் செயலாளர் விக்ரம் மிஸ்ரி வலியுறுத்தியுள்ளார்.

இதற்குப் பதிலளித்த ஈரான் பிரதிநிதி, இந்தியாவுடனான உறவு மிகவும் வலுவானது என்றும், இந்தப் பிரசனை விரைவில் சுமூகமாகத் தீர்க்கப்படும் என்றும் உறுதியளித்துள்ளார்.

ஹார்முஸ் பதற்றம்; சர்வதேச எரிசக்தி விநியோகத்தில் பாதிப்பு?

உலகளாவிய கச்சா எண்ணெய் போக்குவரத்தில் 20 சதவீதத்திற்கும் அதிகமான பங்கு வகிக்கும் ஹார்முஸ் நீரிணையில் ஏற்பட்டுள்ள இந்தப் பதற்றம், சர்வதேச எரிசக்தி விநியோகத்தில் பாதிப்பை ஏற்படுத்தக்கூடும் என்று அஞ்சப்படுகிறது. இந்தியக் கப்பல்களின் பாதுகாப்பான பயணத்தை உறுதி செய்ய அரசு தீவிர நடவடிக்கைகளை எடுத்து வருகிறது.