இங்கிலாந்து,மே.12; பிரிட்டன் உள்ளாட்சித் தேர்தலில் ஆளும் தொழிலாளர் கட்சி (Labour Party) சந்தித்த படுதோல்வியைத் தொடர்ந்து, பிரதமர் கீர் ஸ்டார்மர் (Keir Starmer) பதவி விலக வேண்டும் என்ற கோரிக்கை வலுத்துள்ளது. 70-க்கும் மேற்பட்ட நாடாளுமன்ற உறுப்பினர்களும் (MPs), மூத்த அமைச்சரவை உறுப்பினர்களும் அவருக்கு எதிராக போர்க்கொடி உயர்த்திள்ளனர்.
பெரும் பின்னடைவும் உட்கட்சி மோதலும்
சமீபத்தில் இங்கிலாந்து, ஸ்காட்லாந்து மற்றும் வேல்ஸ் பகுதிகளில் நடைபெற்ற உள்ளாட்சித் தேர்தல்களில் தொழிலாளர் கட்சி கடும் தோல்வியைச் சந்தித்தது. குறிப்பாக, 1999-ம் ஆண்டுக்குப் பிறகு முதல்முறையாக வேல்ஸ் நாடாளுமன்றத்தின் கட்டுப்பாட்டை ‘பிளைட் சிம்ரு’ (Plaid Cymru) கட்சியிடம் தொழிலாளர் கட்சி இழந்தது. இந்தத் தோல்வியானது கீர் ஸ்டார்மரின் தலைமைத்துவத்தின் மீது பெரும் கேள்விகளை எழுப்பியுள்ளது.
அமைச்சரவை மற்றும் உதவியாளர்கள் ராஜினாமா
திங்களன்று (மே 11, 2026), நான்கு அமைச்சரவை உதவியாளர்கள் தங்களது பதவியை ராஜினாமா செய்தனர். ஜோ மோரிஸ், டாம் ரட்லாண்ட், மெலனி வார்டு மற்றும் நௌஷபா கான் ஆகியோர், பிரதமரின் மீது மக்கள் நம்பிக்கை இழந்துவிட்டதாகக் கூறி வெளியேறியுள்ளனர். மேலும், வெளியுறவுச் செயலாளர் யவெட் கூப்பர் மற்றும் உள்துறை அமைச்சர் ஷபானா மஹ்மூத் உள்ளிட்ட மூத்த அமைச்சர்கள், அதிகாரத்தை அமைதியான முறையில் மாற்றியமைக்க ஸ்டார்மரை வலியுறுத்தியுள்ளதாகத் தகவல்கள் தெரிவிக்கின்றன.
ஸ்டார்மரின் பதில்: “நான் விலகப்போவதில்லை”
எதிர்ப்புகள் ஒருபுறம் இருந்தாலும், பிரதமர் கீர் ஸ்டார்மர் பதவி விலக மறுப்பு தெரிவித்துள்ளார். லண்டனில் ஆதரவாளர்களிடையே பேசிய அவர், “என் மீது சந்தேகம் கொண்டவர்கள் இருப்பதை நான் அறிவேன். அவர்களின் எண்ணம் தவறு என்பதை நான் நிரூபிப்பேன்; நான் இங்கிருந்து வெளியேறப் போவதில்லை” என்று உறுதிபடத் தெரிவித்துள்ளார்.
பொருளாதார தேக்கம், வாழ்க்கைச் செலவு அதிகரிப்பு மற்றும் பிரெக்ஸிட் (Brexit) தொடர்பான சிக்கல்களே இந்தத் தோல்விக்குக் காரணம் எனக் கூறப்படுகிறது. தொழிலாளர் கட்சியின் விதிமுறைப்படி, 81 எம்பிக்கள் முறைப்படி கடிதம் அளித்தால் மட்டுமே தலைமை மாற்றத்திற்கான தேர்தல் நடத்த முடியும் என்பது குறிப்பிடத்தக்கது.
பிரிட்டன் அரசியல் அடுத்த சில வாரங்கள் பரபரப்பாக இருக்க வாய்ப்பு
2024-ல் 14 ஆண்டுகால கன்சர்வேட்டிவ் ஆட்சியை முடிவுக்குக் கொண்டுவந்த ஸ்டார்மர், இன்று தனது சொந்தக் கட்சியினரின் எதிர்ப்பையே எதிர்கொண்டுள்ளார். அவருக்குப் பின் வெஸ் ஸ்ட்ரீட்டிங் அல்லது அஞ்சலா ரெய்னர் ஆகியோர் அடுத்த பிரதமராக வர வாய்ப்புள்ளதாக அரசியல் வட்டாரங்கள் கணிக்கின்றன. பிரிட்டன் அரசியலில் அடுத்த சில வாரங்கள் மிகவும் பரபரப்பானதாக இருக்கும் என்று கணிக்கப்படுகிறது.