கனிம வளங்கள் மீதான மாநிலங்களின் நிதி அதிகாரங்களை பறிக்கும் முயற்சி என குற்றச்சாட்டு
MMDR சட்டத் திருத்தம் மாநில உரிமைகள் மீதான நேரடித் தாக்குதல் என திமுக நாடாளுமன்ற குழுத் தலைவர் கனிமொழி குற்றம்சாட்டியுள்ளார். கனிம வளங்கள் மீது மாநில அரசுகளுக்கு உள்ள செஸ் வரி உள்ளிட்ட நிதி அதிகாரங்களைப் பறிக்கும் வகையில், மக்களவையில் முறையான விவாதங்கள் இன்றி இந்த மசோதா நிறைவேற்றப்பட்டுள்ளதாக அவர் தெரிவித்துள்ளார்.
மாநிலங்களின் வரி விதிக்கும் அதிகாரம் பாதிப்பு
2024ஆம் ஆண்டு உச்சநீதிமன்றம் உறுதி செய்த மாநிலங்களின் கனிம வளங்கள் மீதான வரி விதிக்கும் அதிகாரத்தையே MMDR சட்டத் திருத்தம் நீர்த்துப்போகச் செய்யும் வகையில் அமைந்துள்ளதாக கனிமொழி தெரிவித்துள்ளார்.
கனிம வளங்கள் தொடர்பான வருவாய் மாநிலங்களின் நிதி ஆதாரங்களில் முக்கிய பங்கு வகிக்கும் நிலையில், இந்தத் திருத்தம் மாநிலங்களின் நிதி சுயாட்சியை பாதிக்கும் என அவர் கூறியுள்ளார்.
சுற்றுச்சூழலுக்கு பாதிப்பு ஏற்படும் என குற்றச்சாட்டு
கனிம வளங்களை அதிக அளவில் பயன்படுத்துவதற்கான நடவடிக்கைகள் சுற்றுச்சூழலுக்கு பாதிப்பை ஏற்படுத்தக்கூடும் என்றும் கனிமொழி தெரிவித்துள்ளார். மாநிலங்களின் உரிமைகள் மற்றும் சுற்றுச்சூழல் பாதுகாப்பு ஆகிய இரு அம்சங்களையும் கருத்தில் கொள்ளாமல் சட்டத் திருத்தம் கொண்டுவரப்பட்டுள்ளதாக அவர் விமர்சித்துள்ளார்.
சட்டத் திருத்தத்தை திரும்பப் பெற வலியுறுத்தல்
MMDR சட்டத் திருத்தத்தை ஒன்றிய பாஜக அரசு உடனடியாக திரும்பப் பெற வேண்டும் என கனிமொழி வலியுறுத்தியுள்ளார்.
மாநிலங்களின் நிதி அதிகாரங்களையும் கனிம வளங்கள் மீதான உரிமைகளையும் பாதுகாக்க வேண்டும் என்றும், இதுபோன்ற சட்டத் திருத்தங்களை மாநிலங்களுடன் உரிய ஆலோசனை நடத்தி மேற்கொள்ள வேண்டும் என்றும் அவர் தெரிவித்துள்ளார்.