கான்பெரா,ஜன.02; பாகிஸ்தான் டெஸ்ட் கிரிக்கெட் அணியின் முன்னாள் பயிற்சியாளர் ஜேசன் கில்லெஸ்பி, தான் பதவி விலகியதற்கான உண்மையான காரணங்களை உடைத்துப் பேசியுள்ளார். பாகிஸ்தான் கிரிக்கெட் வாரியத்தின் செயல்பாடுகள் தன்னை மிகுந்த மன உளைச்சலுக்கும், அவமானத்திற்கும் உள்ளாக்கியதாக அவர் தெரிவித்துள்ளார்.
தொடர்பு இல்லாத அதிரடி முடிவுகள்
எக்ஸ் தளத்தில் ரசிகர் ஒருவரின் கேள்விக்கு பதிலளித்த கில்லெஸ்பி, “நான் பாகிஸ்தான் டெஸ்ட் அணியின் பயிற்சியாளராக இருந்தபோது, அணியின் சீனியர் உதவிப் பயிற்சியாளரை என்னிடம் எந்த ஆலோசனையும் செய்யாமல் பாகிஸ்தான் கிரிக்கெட் வாரியம் நீக்கியது. ஒரு தலைமைப் பயிற்சியாளராக இதை என்னால் ஏற்றுக்கொள்ளவே முடியவில்லை” என்று பதிவிட்டுள்ளார்
தலைமைப் பயிற்சியாளருக்குக் கிடைக்காத மரியாதை
பயிற்சியாளர் குழுவில் மாற்றங்கள் செய்வது குறித்து தன்னிடம் குறைந்தபட்சத் தகவலைக் கூட பாகிஸ்தான் கிரிக்கெட் வாரியம் பகிரவில்லை என்று கில்லெஸ்பி குற்றஞ்சாட்டியுள்ளார். இது மட்டுமின்றி, இன்னும் பல விஷயங்கள் தன்னைத் தனிப்பட்ட முறையில் அவமானப்படுத்தியதாகவும், அதன் காரணமாகவே தான் பதவியிலிருந்து விலகத் தீர்மானித்ததாகவும் அவர் கூறியுள்ளார்.
மோசின் நக்வி மீதான விமர்சனம்
இதற்கு முன்னதாக, லாகூரில் நடைபெற்ற ‘கனெக்சன் கேம்ப்’ (Connection Camp) கூட்டத்தில் பாகிஸ்தான் கிரிக்கெட் வாரியத் தலைவர் மோசின் நக்வி நேரில் வராததையும் கில்லெஸ்பி விமர்சித்திருந்தார். தென் ஆப்பிரிக்காவிலிருந்து கேரி கிர்ஸ்டனும், ஆஸ்திரேலியாவிலிருந்து தானும் நேரில் வந்தபோது, லாகூரிலேயே இருந்த நக்வி வெறும் ‘Zoom’ வழியாக இணைந்தது தங்களுக்கு அதிர்ச்சியளித்ததாக அவர் குறிப்பிட்டிருந்தார்.
பாகிஸ்தான் கிரிக்கெட் வாரியத்தில் நிர்வாகச் சீர்கேடுகள்!
பாகிஸ்தான் கிரிக்கெட் வாரியத்தில் நிலவும் இந்த நிர்வாகச் சீர்கேடுகள் மற்றும் வெளிநாட்டுப் பயிற்சியாளர்களுக்கு வழங்கப்படும் மரியாதை குறைவு போன்றவை சர்வதேச அளவில் விவாதத்தைக் கிளப்பியுள்ளன. கில்லெஸ்பியின் இந்த வெளிப்படையான பேச்சு, பாகிஸ்தான் கிரிக்கெட் வாரியம் மூலம் உள்நாட்டு அரசியலை மீண்டும் வெளிச்சத்திற்கு கொண்டு வந்துள்ளது.