புதுச்சேரி,ஏப்.05; புதுச்சேரி சட்டமன்றத்திற்கு வரும் 9ஆம் தேதி ஒரே கட்டமாக தேர்தல் நடைபெறவுள்ளது. பரப்புரை வரும் 7ஆம் தேதியுடன் முடிவடையவிருப்பதால், தேர்தல் களத்தில் அனல் பறக்கிறது.
தேர்தலில் ஆளும் என்.ஆர். காங்கிரஸ்- பாஜக கூட்டணி ஒருபுறமும், ஆட்சியைப் பிடிக்கத் துடிக்கும் காங்கிரஸ் கூட்டணி மறுபுறமும் போட்டிப்போட்டுக் கொண்டு கவர்ச்சிகரமான தேர்தல் வாக்குறுதிகளை வாரி வழங்கியுள்ளன. அந்த இரு கூட்டணியினரும் அளித்த வாக்குறுதிகள் என்னென்ன?
காங்கிரசின் அதிரடி ‘கை’வரிசை: இலவசங்களும் மாநில அந்தஸ்தும்
காங்கிரஸ் கட்சியின் அகில இந்தியத் தலைவர் மல்லிகார்ஜுன கார்கே தலைமையில் நடைபெற்ற கூட்டத்தில், அக்கட்சியின் தேர்தல் அறிக்கை வெளியிடப்பட்டது. அதில் இடம்பெற்றுள்ள முக்கிய அம்சங்கள்:
இலவசக் கல்வி: முதலாம் வகுப்பு முதல் ஆராய்ச்சி கல்வி (Ph.D) வரை மாணவர்களுக்கு முற்றிலும் இலவசக் கல்வி வழங்கப்படும்.
மளிகைப் பொருட்கள்: குடும்ப அட்டைதாரர்களுக்கு மாதம் ரூ.2,500 மதிப்பிலான மளிகைப் பொருட்கள் நியாய விலைக் கடைகள் மூலம் இலவசமாக வழங்கப்படும்.
தாலிக்கு தங்கம்: ஏழைப் பெண்களின் திருமணத்திற்கு உதவும் வகையில் ‘தாலிக்கு தங்கம்’ திட்டம் மீண்டும் செயல்படுத்தப்படும்.
மாநில அந்தஸ்து: 2029-ல் ராகுல் காந்தி பிரதமர் ஆனவுடன், புதுச்சேரிக்கு நீண்ட கால கோரிக்கையான ‘தனி மாநில அந்தஸ்து’ பெற்றுத் தரப்படும்.
பாஜகவின் ‘தாமரை’ வியூகம்: பெண்களுக்கும் விவசாயிகளுக்கும் முக்கியத்துவம்
மத்திய அமைச்சர் மன்சுக் மாண்டவியா முன்னிலையில் வெளியிடப்பட்ட பாஜகவின் தேர்தல் வாக்குறுதிகள், குறிப்பாக மகளிர் மற்றும் இளைஞர்களை மையமாகக் கொண்டுள்ளன:
இலவச சிலிண்டர் & ஸ்கூட்டர்: ஆண்டுக்கு 2 சிலிண்டர்கள் இலவசம் மற்றும் 12-ம் வகுப்பு மாணவிகளுக்கு இ-ஸ்கூட்டர் வழங்கும் ‘அன்பு தங்கை திட்டம்’.
வேலைவாய்ப்பில் இடஒதுக்கீடு: அரசுப் பணிகளில் (Group C & D) 60% இடஒதுக்கீடு மற்றும் பல்கலைக்கழகங்களில் புதுச்சேரி மாணவர்களுக்கு 20% முன்னுரிமை.
விவசாயிகள் நலன்: பி.எம்.கிசான் திட்டத்தின் கீழ் ஆண்டுக்கு ரூ.9,000 உதவித்தொகை மற்றும் பயிர் சேதங்களுக்கு ரூ.200 கோடி நிவாரண நிதி.
போக்குவரத்து மேம்பாடு: சென்னை – புதுச்சேரி இடையே ‘வந்தே பாரத்’ ரயில் மற்றும் புதுச்சேரி ரயில் நிலையத்திற்கு ‘மகாகவி பாரதியார்’ பெயர் சூட்டப்படும்.
கல்வி மற்றும் உள்கட்டமைப்பு திட்டங்கள்
இரு கட்சிகளுமே கல்வி மற்றும் உள்கட்டமைப்பிற்கு அதிக முக்கியத்துவம் அளித்துள்ளன. பாஜக சார்பில் ‘பிங்க் ஆட்டோ’ திட்டம் மற்றும் காரைக்கால் திருநள்ளாறு கோவிலுக்கு இலவச மின்சார பஸ் சேவை போன்ற வாக்குறுதிகள் இடம்பெற்றுள்ளன. அதேபோல், காங்கிரஸ் இலவசக் கல்வியை தனது பிரதான ஆயுதமாக முன்னிறுத்துகிறது.
வாக்காளர்களின் முடிவு என்ன?
புதுச்சேரி தேர்தல் களம் வாக்குறுதிகளால் நிரம்பி வழிகிறது. ஒருபுறம் மாநில அந்தஸ்து மற்றும் வாழ்வாதார உதவி என காங்கிரஸ் களம் காண, மறுபுறம் டிஜிட்டல் வளர்ச்சி, போக்குவரத்து மேம்பாடு மற்றும் மகளிர் நலன் என பாஜக வியூகம் வகுத்துள்ளது. இந்த வாக்குறுதிகள் மக்களின் வாக்குகளாக மாறுமா என்பதைப் பொறுத்திருந்துதான் பார்க்க வேண்டும்.