கிரிக்கெட் ரசிகர்களுக்கு உற்சாகமான செய்தியாக, ஆஸ்திரேலியாவின் பிரபலமான பிக் பாஷ் லீக் (BBL) தொடரின் ஒரு போட்டி சென்னை சேப்பாக்கம் எம்.ஏ. சிதம்பரம் மைதானத்தில் நடைபெற உள்ளது. இந்த அறிவிப்பு இந்திய மற்றும் ஆஸ்திரேலிய கிரிக்கெட் ரசிகர்களிடையே பெரும் எதிர்பார்ப்பை ஏற்படுத்தியுள்ளது.
இந்தப் போட்டியை சென்னையில் நடத்த முடிவு செய்ததற்கான காரணத்தை விளக்கிய BBL தலைவர் டாப்சன், “சென்னையில் கிரிக்கெட்டுக்கு மிகப்பெரிய ரசிகர் பட்டாளம் உள்ளது. சேப்பாக்கம் மைதானம் எப்போதும் கிரிக்கெட் திருவிழாவைப் போன்ற சூழலை உருவாக்கும். அதனால், முதல் போட்டிக்கும் அரங்கம் நிறைந்த ஆதரவு கிடைக்கும் என்ற நம்பிக்கை உள்ளது” என்று தெரிவித்துள்ளார்.
இந்த சிறப்பு போட்டியில் மெல்பர்ன் ரெனகேட்ஸ் மற்றும் பெர்த் அணிகள் மோத உள்ளன. போட்டி டிசம்பர் 12ஆம் தேதி பிற்பகல் 2.40 மணிக்கு தொடங்கும் என அறிவிக்கப்பட்டுள்ளது.
சேப்பாக்கம் மைதானம் இந்திய கிரிக்கெட்டின் அடையாளங்களில் ஒன்றாகும். இந்திய அணியின் சர்வதேச போட்டிகள், ஐபிஎல் மற்றும் பல முக்கிய கிரிக்கெட் தொடர்களுக்கு வரலாற்றுச் சிறப்புமிக்க அரங்காக விளங்கும் இந்த மைதானத்தில், தற்போது பிக் பாஷ் போட்டி நடைபெறுவது ரசிகர்களிடையே கூடுதல் உற்சாகத்தை ஏற்படுத்தியுள்ளது.
இந்த முயற்சி, சர்வதேச டி20 லீக் போட்டிகளை உலகின் பல்வேறு கிரிக்கெட் மையங்களுக்கு கொண்டு செல்லும் புதிய முயற்சியாகவும் பார்க்கப்படுகிறது. சென்னை ரசிகர்களின் ஆதரவு இந்த போட்டியின் வெற்றிக்கு முக்கிய காரணியாக இருக்கும் என எதிர்பார்க்கப்படுகிறது.