மெக்சிகோ சிட்டி,ஜூன்.25; உலகக் கோப்பை கால்பந்து தொடரின் விறுவிறுப்பான லீக் ஆட்டத்தில், செக்கியா (Czechia- செக் குடியரசு) அணியை 0-3 என்ற கோல் கணக்கில் வீழ்த்தி மெக்சிகோ அணி வரலாற்றுச் சாதனை படைத்துள்ளது.
உலகக் கோப்பையின் குரூப் சுற்றில் தான் விளையாடிய மூன்று போட்டிகளிலும் மெக்சிகோ அணி வெற்றி பெறுவது இதுவே முதல் முறையாகும். அதேவேளையில் படுதோல்வியடைந்த செக்கியா (Czechia- செக் குடியரசு) அணி நடப்பு உலகக் கோப்பை தொடரிலிருந்து வெளியேறியுள்ளது.
இரண்டாம் பாதியில் மெக்சிகோவின் கோல் மழை
மெக்சிகோ தலைநகர் மெக்சிகோ சிட்டியில் உள்ள மைதானத்தில் இந்திய நேரப்படி இன்று (ஜூன் 25, வியாழன்) காலை 6.30 மணிக்கு நடைபெற்ற இந்த ஆட்டத்தின் முதல் பாதியில் இரு அணிகளும் கோல் அடிக்க எடுத்த முயற்சிகள் பலன் தரவில்லை. எனினும், ஆட்டத்தின் இரண்டாம் பாதியில் மெக்சிகோ அணி ஆக்ரோஷமான ஆட்டத்தை வெளிப்படுத்தியது.
55-வது நிமிடம்: மெக்சிகோவின் 22 வயது இளம் வீரர் மேடியோ சாவேஸ் (Mateo Chavez) தனது முதல் உலகக் கோப்பை தொடரிலேயே அற்புதமாக ஒரு கோல் அடித்து அணியை முன்னிலைப்படுத்தினார்.
61-வது நிமிடம்: அடுத்த ஆறே நிமிடங்களில், மெக்சிகோவின் நட்சத்திர வீரர் ஜூலியன் குய்னோன்ஸ் (Julian Quinones) நடப்பு தொடரில் தனது இரண்டாவது கோலை பதிவு செய்து அணியின் வெற்றியை உறுதி செய்தார்.
கடைசி நிமிடம் (Injury Time): ஆட்டத்தின் கூடுதல் நேரத்தில் மாற்று ஆட்டக்காரராக களம் புகுந்த ஆல்வாரோ ஃபிடால்கோ (Alvaro Fidalgo) மெக்சிகோ அணியின் 3ஆவது கோலை அடித்து 3-0 என்ற கணக்கில் வெற்றியை முழுமையாக்கினார்.
மெக்சிகோவின் வரலாற்று சாதனை மற்றும் புதிய மைல்கற்கள்
இதற்கு முன்பு 1986 மற்றும் 2002 ஆம் ஆண்டுகளில் குரூப் சுற்றில் இரண்டு வெற்றிகள் மற்றும் ஒரு டிரா பெற்றதே மெக்சிகோ அணியின் சிறந்த செயல்பாடாக இருந்தது. ஆனால், தற்போது குரூப் ஏ பிரிவில் மூன்று போட்டிகளிலும் வென்று 9 புள்ளிகளுடன் முதலிடம் பிடித்து அடுத்த சுற்றுக்கு (Round of 32) முன்னேறியுள்ளது.
அடுத்த செவ்வாய்க்கிழமை அன்று அஸ்டெகா மைதானத்தில் (Azteca Stadium) நடைபெறவுள்ள நாக்-அவுட் சுற்றில் மெக்சிகோ அணி விளையாடவுள்ளது.
சாதனைகளின் ஆட்டம்:
கில்பர்ட்டோ மோரா (Gilberto Mora): மெக்சிகோ அணிக்காக உலகக் கோப்பையில் களமிறங்கிய மிக இளம் வயது வீரர் (17 வயது) என்ற பெருமையை இவர் பெற்றார்.
கில்லெர்மோ ‘மெமோ’ ஒச்சோவா (Guillermo Ochoa): 40 வயதான மெக்சிகோவின் புகழ்பெற்ற கோல்கீப்பர் ஒச்சோவா 77ஆவது நிமிடத்தில் களம் இறங்கினார். இதன் மூலம் லியோனல் மெஸ்ஸி மற்றும் கிறிஸ்டியானோ ரொனால்டோ ஆகியோருக்குப் பிறகு 6 உலகக் கோப்பை தொடர்களில் பங்கேற்ற உலகின் அரிதான வீரர்களின் பட்டியலில் இணைந்தார்.
அஸ்டெகா மைதானத்தில் எழுந்த சர்ச்சை முழக்கம்
மகிழ்ச்சியான தருணங்களுக்கு மத்தியில், மைதானத்தில் ரசிகர்களின் சில விரும்பத்தகாத செயல்களும் அரங்கேறின. முதல் பாதியின் கடைசியில் செக்கியா (Czechia- செக் குடியரசு) கோல்கீப்பர் மேடேஜ் கோவர் பந்தை உதைக்க முற்பட்ட போது, மெக்சிகோ ரசிகர்கள் சிலர் ஓரினச் சேர்க்கையாளர்களுக்கு எதிரான சர்ச்சைக்குரிய முழக்கங்களை (Homophobic Chant) எழுப்பினர்.
இத்தகைய முழக்கங்களுக்காக மெக்சிகோ கால்பந்து கூட்டமைப்பிற்கு ஃபிபா (FIFA) ஏற்கனவே பலமுறை லட்சக்கணக்கான டாலர்களை அபராதமாக விதித்துள்ளது குறிப்பிடத்தக்கது.
நாக்-்அவுட் சுற்றுகளிலும் சவாலாக இருக்குமா மெக்சிகோ அணி?
சொந்த மண்ணில் ரசிகர்களின் பேராதரவோடு விளையாடிய மெக்சிகோ அணி, தங்களின் அபார திறமையால் புதிய சரித்திரம் படைத்துள்ளது. இளம் வீரர்களின் வேகம் மற்றும் அனுபவ வீரர்களின் விவேகத்துடன் விளையாடி வரும் மெக்சிகோ, இந்த உலகக் கோப்பையில் நாக்-அவுட் சுற்றுகளிலும் பெரும் சவாலாக விளங்கும் என எதிர்பார்க்கப்படுகிறது.
அதே வேளையில், 3 போட்டிகளில் வெறும் 1 புள்ளியுடன் வெளியேறும் செக் குடியரசு அணிக்கு இதுவொரு ஏமாற்றமளிக்கும் தொடராக முடிந்துள்ளது.