ஹூஸ்டன்,ஜூன்.27; உலகக் கோப்பை கால்பந்து திருவிழா விறுவிறுப்பான கட்டத்தை எட்டியுள்ளது. லீக் ஆட்டங்கள் நாளை (ஜூன் 28, 2026) நிறைவடையவிருக்கும் நிலையில், நாக்-அவுட் சுற்றுக்கு முன்னேறும் அணிகள் ஒவ்வொன்றாக முடிவாகி வருகின்றன.
அதன்படி அமெரிக்காவின் ஹூஸ்டன் (Houston) மைதானத்தில் இன்று (ஜூன் 27, சனிக்கிழமை) அதிகாலை குரூப் எச் (Group H) பிரிவில் நடைபெற்ற முக்கியமான கடைசி லீக் ஆட்டத்தில் கேப் வெர்டே (Cape Verde) மற்றும் சௌதி அரேபியா (Saudi Arabia) அணிகள் மோதின.
பரபரப்பாக நடந்த இந்த ஆட்டம் 0-0 என்ற கோல் கணக்கில் டிராவில் முடிவடைந்தது. இந்த முடிவின் மூலம், உலகக்கோப்பை வரலாற்றிலேயே நாக்-அவுட் சுற்றுக்கு (Round of 32) தகுதிபெற்ற மிகச்சிறிய நாடு என்ற பெருமையை கேப் வெர்டே பெற்றுள்ளது. அதே நேரத்தில், சௌதி அரேபியா தொடரிலிருந்து வெளியேற்றப்பட்டு அதிர்ச்சியளித்துள்ளது.
களத்தில் நடந்த சுவாரசியங்கள் மற்றும் முக்கிய தருணங்கள்
ஆட்டத்தின் தொடக்கம் முதலே இரு அணிகளும் கோல் அடிக்க தீவிரமாக போராடின. சௌதி அரேபியா அணிக்கு இந்த போட்டியில் வெற்றி பெற்றால் மட்டுமே அடுத்த சுற்றுக்கு செல்ல முடியும் என்ற இக்கட்டான சூழ்நிலை இருந்தது.
33-வது நிமிடம்: சௌதி அரேபிய அணியின் வலுவான தடுப்பாட்ட வீரர் ஹசன் அல் தம்பக்டி (Hassan Al Tambakti) காயம் காரணமாக ஆட்டத்திலிருந்து பாதியிலேயே வெளியேறினார். இது சௌதி அணிக்கு பெரும் பின்னடைவாக அமைந்தது. அவருக்குப் பதிலாக அலி லஜாமி களம் புகுந்தார்.
45+2-வது நிமிடம்: சௌதி வீரர் முகமது கன்னோ (Mohamed Kanno) அடித்த அருமையான ஹெடரை கேப் வெர்டேவின் அனுபவமிக்க 40 வயது கோல்கீப்பர் வோசின்ஹா (Vozinha) சாதுரியமாக தடுத்து நிறுத்தினார்.
90+2-வது நிமிடம்: ஆட்டத்தின் கூடுதல் நேரத்தில் சௌதியின் அப்துல்லா அல் ஹம்தான் அடித்த கோல் வாய்ப்பையும் வோசின்ஹா தடுத்து நிறுத்தி அணியின் வரலாற்றுப் பயணத்தை உறுதி செய்தார். மறுபுறம் கேப் வெர்டே அணியின் லாரோஸ் டுவார்டே அடித்த பந்தை சௌதி கோல்கீப்பர் முகமது அல் ஒவைஸ் தடுத்து நிறுத்தினார். முடிவில் இரு அணிகளாலும் கோலடிக்க முடியாததால் ஆட்டம் சமனில் முடிந்தது.
குரூப் எச் புள்ளிப் பட்டியல் நிலவரம்
ஸ்பெயின் அணி உருகுவேயை 1-0 என்ற கணக்கில் வீழ்த்தியதைத் தொடர்ந்து, 7 புள்ளிகளுடன் குரூப் எச் பிரிவில் முதலிடம் பிடித்தது. கேப் வெர்டே அணி தனது மூன்று லீக் போட்டிகளையும் டிரா செய்து (ஸ்பெயின், உருகுவே மற்றும் சௌதி அரேபியாவுடன்) 3 புள்ளிகளுடன் இரண்டாம் இடத்தை பிடித்து அடுத்த சுற்றுக்கு முன்னேறியது. உருகுவே மற்றும் சௌதி அரேபியா ஆகிய இரு அணிகளும் தலா 2 புள்ளிகளுடன் தொடரிலிருந்து வெளியேறின.
சுமார் 5,00,000 மக்கள் தொகையை மட்டுமே கொண்ட சிறிய தீவு நாடான கேப் வெர்டே, கால்பந்து உலகின் ஜாம்பவான்களான ஸ்பெயின் மற்றும் உருகுவே அணிகளுக்கு எதிராக சிறப்பான ஆட்டத்தை வெளிப்படுத்தி ஒட்டுமொத்த உலகின் கவனத்தையும் ஈர்த்துள்ளது.
அடுத்த சுற்று: அர்ஜென்டினாவுடன் மோதல்!
வரலாற்று சாதனை படைத்துள்ள கேப் வெர்டே அணி, நாக்-அவுட் சுற்றில் (Round of 32) நடப்பு உலகக்கோப்பை சாம்பியனான லியோனல் மெஸ்ஸியின் அர்ஜென்டினா அணியை எதிர்கொள்ளும் என எதிர்பார்க்கப்படுகிறது. இது குறித்துப் பேசிய கேப் வெர்டே வீரர் டெராய் டுவார்டே, “நான் ஒரு கனவு உலகில் இருப்பது போல் உணர்கிறேன். சிறுவயதிலிருந்தே உலகக்கோப்பையில் விளையாட வேண்டும் என்று கனவு கண்டேன். அடுத்த போட்டி அர்ஜென்டினாவுடன், அது கடினமான போட்டி தான், ஆனால் எங்களால் எதுவும் சாத்தியம் என்று நம்புகிறோம்” என்று நம்பிக்கையுடன் தெரிவித்துள்ளார்.
கால்பந்து விளையாட்டு எப்போதும் கணிக்க முடியாத ஒன்று என்பதை கேப் வெர்டே அணியின் இந்த அசாத்திய பயணம் மீண்டும் நிரூபித்துள்ளது. உலகக்கோப்பையில் முதல் முறையாக களமிறங்கி, உலகின் மிகப்பெரிய ஜாம்பவான்களை அலறவிட்டு நாக்-அவுட் சுற்றுக்கு முன்னேறியுள்ள “புளூ ஷார்க்ஸ்” (Blue Sharks) அணியின் இந்த சாதனை கால்பந்து வரலாற்றில் பொன்னெழுத்துக்களால் பொறிக்கப்பட வேண்டிய ஒன்றாகும்.