ஜெய்ப்பூர்,ஏப்.30; ஐபிஎல் தொடரில் ராஜஸ்தான் ராயல்ஸ் அணிக்காக விளையாடி வரும் 15 வயது இளம் வீரர் வைபவ் சூர்யவன்ஷி, தனது அதிரடி ஆட்டத்தால் ஒட்டுமொத்த கிரிக்கெட் உலகையும் திரும்பிப் பார்க்க வைத்துள்ளார்.
சூர்யவன்ஷி பேட்டில் AI சிப் உள்ளதா? என வேடிக்கையான கேள்வி
இவரது அபாரமான பேட்டிங் திறமையைக் கண்டு வியந்த பாகிஸ்தான் கிரிக்கெட் நிபுணர் நௌமன் நியாஸ், வைபவ் தனது பேட்டில் ‘AI சிப்’ (செயற்கை நுண்ணறிவு சிப்) பயன்படுத்துகிறாரா? என எழுப்பியுள்ள கேள்வி சமூக வலைதளங்களில் பெரும் விவாதத்தை கிளப்பியது.
“இந்தச் சிறுவன் விளையாடும் விதம் வியப்பாக இருக்கிறது; 15 வயதில் இவ்வளவு வேகம் மற்றும் நுணுக்கத்துடன் விளையாடுவது சாத்தியமற்றது; ஊக்கமருந்து சோதனை செய்வது போல, இவரது பேட்டை ஆய்வகத்திற்கு அனுப்பி சோதனை செய்ய வேண்டும்; ஒருவேளை இவரது பேட்டிற்குள் ‘AI சிப்’ பொருத்தப்பட்டிருக்கலாம்” என நகைச்சுவையாகவும் அதே சமயம் சர்ச்சைக்குரிய வகையிலும் கருத்து தெரிவித்தார்.
வைபவ் சூர்யவன்ஷியின் நயமான பதில்
கிரிக்கெட் நிபுணர் நௌமன் நியாஸின் இந்தக் கருத்து சமூக வலைதளங்களில் வைரலான நிலையில், ராஜஸ்தான் ராயல்ஸ் அணி வெளியிட்டுள்ள வீடியோவில் வைபவ் இதற்கு தகுந்த பதில் கொடுத்துள்ளார்.
அதில், “உங்களது மட்டையில் AI சிப் இருக்கிறதா?” என அவரிடம் கேட்கப்பட்டது. அதற்குப் புன்னகையுடன் பதிலளித்த வைபவ், “அப்படியெல்லாம் ஒன்றும் இல்லை. என் பேட்டில் ஏதோ ஒரு விசேஷமான விஷயத்தை கடவுளே பொருத்தியிருப்பதாக நினைக்கிறேன்; அவர் கொடுத்த அந்த திறமையைத்தான் நான் பயன்படுத்தி விளையாடுகிறேன்” எனத் தெரிவித்துள்ளார்.
ஐபிஎல் சூர்யவன்ஷி படைத்துவரும் சாதனைகள்
வைபவ் சூர்யவன்ஷி இந்த சீசனில் இதுவரை விளையாடியுள்ள 9 போட்டிகளில் 400 ரன்களைக் குவித்து ஆரஞ்சு தொப்பி (Orange Cap) பந்தயத்தில் முன்னிலையில் உள்ளார். சன்ரைசர்ஸ் ஐதராபாத் அணிக்கு எதிரான போட்டியில் வெறும் 37 பந்துகளில் சதம் விளாசி சாதனை படைத்தார். 238-க்கும் அதிகமான ஸ்டிரைக் ரேட்டில் விளையாடும் இவருக்கு, விராட் கோலி மற்றும் கே.எல். ராகுல் போன்ற ஜாம்பவான்களே பாராட்டு தெரிவித்து வருகின்றனர்.
தொழில்நுட்பம் வளர்ந்துவிட்ட இன்றைய காலத்தில், ஒரு வீரரின் அசாத்தியமான திறமையை ‘AI’ உடன் ஒப்பிடுவது வழக்கமாகிவிட்டது. இருப்பினும், வைபவ் சூர்யவன்ஷியின் இந்த வளர்ச்சி அவரது கடின உழைப்பிற்கும் பயிற்சியுமே சான்றாகும். 15 வயதிலேயே ஜாம்பவான்களை மிரள வைக்கும் இந்த இளம் புயல், விரைவில் இந்திய அணியில் இடம்பிடிப்பார் என எதிர்பார்க்கப்படுகிறது.