அட்லாண்டா,ஜூன்.17; உலகக் கோப்பை கால்பந்து (FIFA World Cup 2026) வரலாற்றில் ஒரு புதிய அத்தியாயம் எழுதப்பட்டுள்ளது. இரு தினங்களுக்கு முன்னர் (ஜூன் 15, 2026) அட்லாண்டா மைதானத்தில் நடந்த குரூப்-எச் (Group H) போட்டியில், உலகக் கோப்பைத் தொடருக்கு முதன்முறையாகத் தகுதி பெற்றுள்ள கேப் வெர்டே (Cape Verde) அணி, முன்னாள் உலக சாம்பியனான ஸ்பெயினை எதிர்கொண்டது.
உலகமே ஸ்பெயின் எளிதாக வெல்லும் என்று எதிர்பார்த்த நிலையில், ஒட்டுமொத்த கால்பந்து உலகையும் தன் பக்கம் திருப்பியுள்ளார் கேப் வெர்டே அணியின் 40 வயது நிரம்பிய கோல்கீப்பர் வோசின்யா (Vozinha).
ஸ்பெயினின் தாக்குதலைத் தகர்த்த இரும்புச் சுவர்
போட்டித் துவங்கியது முதலே நட்சத்திர வீரர்களைக் கொண்ட ஸ்பெயின் அணி ஆதிக்கம் செலுத்தியது. பெட்ரி (Pedri), ஃபெரான் டோரஸ் (Ferran Torres), மிகெல் ஒயர்சாபால் மற்றும் இரண்டாம் பாதியில் களம் புகுந்த இளம் சூப்பர் ஸ்டார் லாமின் யமால் (Lamine Yamal) என ஸ்பெயின் அணி அடுத்தடுத்து கடுமையான தாக்குதல்களைத் தொடுத்தது.
முழுப் போட்டியிலும் ஸ்பெயின் அணி 27 முறை கோல் அடிக்க முயற்சித்தது, அதில் 7 முயற்சிகள் மிகத் துல்லியமாக இலக்கை நோக்கி (Shots on Target) வந்தன. ஆனால், கேப் வெர்டே அணியின் கோல் கம்பத்திற்கு முன்னால் இரும்புச் சுவராக நின்றார் வோசின்ஹா. அசாத்தியமான 7 டைவிங் சேவ்களை (Saves) செய்து ஸ்பெயின் அணியை கோல் அடிக்க விடாமல் விரக்தியடையச் செய்தார்.
கண்ணீரில் நனைந்த வரலாற்றுத் தருணம்
போட்டி 0-0 என்ற கணக்கில் சமனில் முடிவடைந்ததை அறிவிக்கும் இறுதி விசில் ஊதப்பட்டதும், வோசின்ஹா மைதானத்திலேயே மண்டியிட்டு ஆனந்தக் கண்ணீர் வடித்தார். கேப் வெர்டே அணி தனது முதல் உலகக் கோப்பை போட்டியிலேயே பலம் வாய்ந்த ஸ்பெயினுக்கு எதிராக 1 புள்ளியைப் பெற்று வரலாறு படைத்தது. இந்த அசாத்திய ஆட்டத்திற்காக வோசின்ஹாவிற்கு ‘ஆட்டநாயகன்’ (Player of the Match) விருது வழங்கப்பட்டது.
உணர்ச்சிகளை கட்டுப்படுத்த முடியாமல் கண்ணீர்விட்ட கோல்கீப்பர்
போட்டிக்குப் பின் பேசிய அவர், தனது உணர்ச்சிகளைக் கட்டுப்படுத்த முடியாமல் அழுததற்கான காரணத்தைக் கூறினார். “என் வாழ்நாள் முழுவதும் இந்த ஒரு தருணத்திற்காகவே உழைத்தேன். எனக்கு 40 வயதாகிறது, 25 வயதில்தான் தொழில்முறை கால்பந்து விளையாடவே தொடங்கினேன்.
எனது சிறுவயதில் என்னை வளர்த்த தாத்தா, பாட்டி இன்று உயிரோடு இல்லை. விசாவுக்கான கட்டணம் அதிகமாக இருந்ததால் எனது தாயாராலும் அமெரிக்காவிற்கு வந்து இந்த வரலாற்றுத் தருணத்தை நேரில் பார்க்க முடியவில்லை. அவர்களின் நினைவு வந்ததால் தான் என்னால் கண்ணீரைக் கட்டுப்படுத்த முடியவில்லை.” என நா தழுதழுக்க கூறினார்.
ஒரே இரவில் மாறிய இன்ஸ்டாகிராம் நாயகன்
வோசின்யாவின் இந்த அர்ப்பணிப்பும் அசாத்திய திறமையும் மைதானத்தோடு நின்றுவிடவில்லை. சமூக வலைத்தளங்களிலும் அவரது புகழ் காட்டுத்தீயாய் பரவியது. போட்டி தொடங்குவதற்கு முன்பு வெறும் 50,000 பின்தொடர்பவர்களைக் (Followers) கொண்டிருந்த அவரது இன்ஸ்டாகிராம் பக்கம், போட்டி முடிந்த சில மணி நேரங்களிலேயே 2.4 மில்லியனுக்கும் (சுமார் 24 லட்சம்) அதிகமான பின்தொடர்பவர்களைப் பெற்று உலகளவில் ட்ரெண்டானது.
“வயது என்பது வெறும் எண்கள் மட்டுமே” என்பதை 40 வயதில் உலகக் கோப்பையில் அறிமுகமாகி, உலகின் தலைசிறந்த அணிக்கு எதிராக ‘கிளீன் ஷீட்’ (Clean Sheet) தக்கவைத்ததன் மூலம் வோசின்யா நிரூபித்துள்ளார். கடின உழைப்பும், கனவை நோக்கிய விடாமுயற்சியும் இருந்தால் எந்த வயதிலும் உலகை வெல்லலாம் என்பதற்கு வோசின்யாவின் இந்த உலகக் கோப்பை அறிமுக ஆட்டம் ஒரு மிகச்சிறந்த உதாரணம்.