சென்னை,பிப்.20; தமிழக நகராட்சி நிர்வாகத்துறை அமைச்சர் கே.என். நேருவுக்கு எதிரான ‘வேலைக்கு பணம்’ (Cash-for-jobs) விவகாரத்தில், லஞ்ச ஒழிப்புத்துறை (DVAC) உடனடியாக வழக்குப்பதிவு செய்ய வேண்டும் என்று சென்னை உயர்நீதிமன்றம் இன்று (20.02.2026) அதிரடி உத்தரவு பிறப்பித்துள்ளது.
கே.என்.நேரு மீது ஊழல் குற்றச்சாட்டு; பின்னணி என்ன?
கடந்த 2024-25 நிதியாண்டில் நகராட்சி நிர்வாகம் மற்றும் குடிநீர் வழங்கல் துறையில் 2,500-க்கும் மேற்பட்ட காலிப்பணியிடங்களை நிரப்பியதில் பெருமளவில் முறைகேடுகள் நடந்ததாக அமலாக்கத்துறை (ED) குற்றஞ்சாட்டியது. ரூ.1,020 கோடி வரை ஊழல் செய்திருப்பதாக கே.என்.நேரு மீது குற்றஞ்சுமத்தப்பட்டுள்ளது. இது தொடர்பாக கடந்த அக்டோபர் 2025-ல் அமலாக்கத்துறை தமிழ்நாடு காவல்துறைக்கு 232 பக்கங்கள் கொண்ட விரிவான ஆதாரங்களை அனுப்பியிருந்தது.
இந்த ஆதாரங்களின் அடிப்படையில் அமைச்சர் கே.என். நேரு மற்றும் அவரது ஆதரவாளர்கள் மீது வழக்குப்பதிவு செய்யக்கோரி அ.தி.மு.க. முன்னாள் எம்.எல்.ஏ இன்பதுரை மற்றும் ஆதிநாராயணன் ஆகியோர் சென்னை உயர்நீதிமன்றத்தில் மனு தாக்கல் செய்திருந்தனர்.
நீதிமன்றத்தின் கடுமையான கண்டனம்
இந்த மனுவை இன்று (பிப்ரவரி 20, 2026) விசாரித்த தலைமை நீதிபதி மணீந்திர மோகன் ஸ்ரீவஸ்தவா மற்றும் நீதிபதி ஜி. அருள் முருகன் தலைமையிலான அமர்வு, தமிழ்நாடு அரசின் தாமதத்திற்கு கடும் கண்டனம் தெரிவித்தது.
நீதிபதிகள் கூறியதாவது:
“அமலாக்கத்துறை வழங்கிய ஆதாரங்கள் ஒரு குற்றவியல் வழக்கை (Cognisable Offence) பதிவு செய்ய போதுமானதாக உள்ளது.”
“ஆதாரங்கள் கிடைத்தும் வழக்குப்பதிவு செய்யாமல் ‘விசாரணை’ என்ற பெயரில் காலத்தை கடத்துவது ஏற்கத்தக்கதல்ல.”
“கோடிக்கணக்கான ரூபாய் கைமாறியுள்ளதாக கூறப்படும் இந்த விவகாரத்தில், உடனடியாக எப்.ஐ.ஆர் (FIR) பதிவு செய்து விசாரணையைத் தொடங்க வேண்டும்.”
லஞ்ச ஒழிப்புத்துறைக்கு உத்தரவு
முன்னதாக, லஞ்ச ஒழிப்புத்துறை சார்பில் ஆஜரான வழக்கறிஞர், இந்த புகார் குறித்து விரிவான விசாரணை (Detailed Inquiry) நடைபெற்று வருவதாகத் தெரிவித்தார். ஆனால், அதனை நிராகரித்த நீதிபதிகள், அமலாக்கத்துறை பகிர்ந்த தகவல்கள் ஒரு முதல் தகவல் அறிக்கை பதிவு செய்ய போதுமான முகாந்திரத்தைக் கொண்டுள்ளதாகக் கூறி, உடனடியாக வழக்குப் பதிவு செய்ய உத்தரவிட்டனர்.
அரசியல் தாக்கம்
அமைச்சர் கே.என். நேருவுக்கு எதிராக உயர்நீதிமன்றம் இத்தகைய உத்தரவை பிறப்பித்திருப்பது தமிழ்நாடு அரசியலில் பெரும் பரபரப்பை ஏற்படுத்தியுள்ளது. ‘வேலைக்கு பணம்’ கொடுத்த விவகாரத்தில் வாட்ஸ்அப் உரையாடல்கள், டிஜிட்டல் ஆதாரங்கள் மற்றும் ₹10 ரூபாய் நோட்டுகளை அடையாளமாகப் பயன்படுத்தியது போன்ற ஆதாரங்களை அமலாக்கத்துறை சமர்ப்பித்துள்ளதாகக் கூறப்படுகிறது.
நீதிமன்றத்தின் உத்தரவால் விசாரணை வேகமெடுக்கும் எனத் தகவல்
நீதிமன்றத்தின் இந்த அதிரடி உத்தரவு, ஊழல் புகார்களுக்கு எதிரான விசாரணையில் வேகம் காட்டும் என்று எதிர்பார்க்கப்படுகிறது. இந்த வழக்கில் அடுத்தகட்டமாக லஞ்ச ஒழிப்புத்துறை மேற்கொள்ளும் நடவடிக்கைகள் அமைச்சருக்கு மேலும் நெருக்கடியை ஏற்படுத்துமா என்பதைப் பொறுத்திருந்து தான் பார்க்க வேண்டும்.