#சென்னை விமான நிலைய நிர்வாகம் மாற்றம்: பிரதமர் மோடிக்கு முதல்வர் விஜய் கடிதம்!

AAI-க்கு பதிலாக தகுதி வாய்ந்த புதிய நிறுவனத்திடம் நிர்வாகத்தை ஒப்படைக்க கோரிக்கை – பயணிகள், சரக்கு கையாளுதலில் முன்னேற்றம் தேவை என வலியுறுத்தல்

சென்னை விமான நிலைய நிர்வாகம் தொடர்பாக பிரதமர் நரேந்திர மோடிக்கு முதலமைச்சர் விஜய் கடிதம் எழுதியுள்ளார். சென்னை சர்வதேச விமான நிலையத்தை தற்போது நிர்வகித்து வரும் இந்திய விமான நிலையங்கள் ஆணையமான AAI-க்கு பதிலாக, தகுதி வாய்ந்த வேறு நிறுவனத்திடம் விமான நிலையத்தின் இயக்கம், நிர்வாகம் மற்றும் எதிர்கால மேம்பாட்டுப் பணிகளை ஒப்படைக்க வேண்டும் என அவர் கோரிக்கை விடுத்துள்ளார்.

சென்னை விமான நிலையம் தென்னிந்தியாவின் முக்கிய விமானப் போக்குவரத்து மையங்களில் ஒன்றாக உள்ள நிலையில், சர்வதேச தரநிலைகள் மற்றும் பயணிகளின் எதிர்பார்ப்புகளுக்கு ஏற்ப அதன் செயல்பாடுகள் மேம்படுத்தப்பட வேண்டும் என முதலமைச்சர் விஜய் தனது கடிதத்தில் குறிப்பிட்டுள்ளதாக தகவல்கள் தெரிவிக்கின்றன.

பயணிகள் எண்ணிக்கையில் 6-வது இடம்

சென்னை விமான நிலைய நிர்வாகம் தொடர்பான தனது கோரிக்கைக்கு ஆதரவாக பயணிகள் போக்குவரத்து குறித்த புள்ளிவிவரங்களையும் முதலமைச்சர் விஜய் சுட்டிக்காட்டியுள்ளார்.

ஏப்ரல் 2026 நிலவரப்படி, இந்திய விமான நிலையங்களின் பயணிகள் போக்குவரத்து பட்டியலில் சென்னை விமான நிலையம் கொல்கத்தாவுக்கு பின்னால் 6-வது இடத்துக்கு சென்றுள்ளதாக கடிதத்தில் குறிப்பிடப்பட்டுள்ளது. 2025-26 நிதியாண்டில் சென்னை விமான நிலையம் சுமார் 2.301 கோடி பயணிகளை கையாண்டதாகவும் தெரிவிக்கப்பட்டுள்ளது.

மேலும், கொரோனா தொற்றுக்கு முந்தைய காலகட்டத்தில் பதிவான சுமார் 2.254 கோடி பயணிகளுடன் ஒப்பிடும்போது, பயணிகள் எண்ணிக்கையில் குறிப்பிடத்தக்க வளர்ச்சி ஏற்படவில்லை என்றும் கடிதத்தில் சுட்டிக்காட்டப்பட்டுள்ளது.

சரக்கு விமான இயக்கத்திலும் வளர்ச்சி தேவை

சென்னை விமான நிலையத்தின் சரக்கு விமான இயக்க வளர்ச்சி குறித்தும் முதலமைச்சர் விஜய் தனது கடிதத்தில் குறிப்பிட்டுள்ளார்.

2026 மே மாதத்தில் சென்னையில் சரக்கு விமானங்களின் இயக்கம் 6 சதவீதம் மட்டுமே அதிகரித்த நிலையில், பெங்களூருவில் இதே காலகட்டத்தில் 14.5 சதவீதம் வளர்ச்சி பதிவாகியுள்ளதாக கடிதத்தில் கூறப்பட்டுள்ளது. இதனால், சரக்கு கையாளுதல் மற்றும் விமான இயக்கங்களிலும் சென்னை விமான நிலையத்தின் செயல்திறனை மேம்படுத்த வேண்டிய அவசியம் உள்ளதாக முதலமைச்சர் தெரிவித்துள்ளார்.

2025-26 நிதியாண்டில் சென்னை விமான நிலையம் மொத்தம் 1,58,702 விமான இயக்கங்களை கையாண்டதாகவும், சராசரியாக நாளொன்றுக்கு சுமார் 435 விமானங்கள் இயக்கப்பட்டதாகவும் கடிதத்தில் குறிப்பிடப்பட்டுள்ளது. இதில் சுமார் 320 உள்நாட்டு விமானங்களும், 115 சர்வதேச விமானங்களும் அடங்கும்.

நிர்வாகத்தை மாற்ற வேண்டும் என கோரிக்கை

சென்னை விமான நிலையத்தில் பயணிகள் எதிர்கொள்ளும் சில பிரச்சினைகளையும் முதலமைச்சர் விஜய் தனது கடிதத்தில் சுட்டிக்காட்டியுள்ளார்.

பராமரிப்பு குறைபாடுகள், கழிவறைகள் மற்றும் பயணிகள் அமரும் பகுதிகளில் உள்ள சிக்கல்கள், குளிர்சாதன வசதிகளில் ஏற்படும் பழுதுகள், விமான நிலைய முனையங்களை அணுகுவதில் உள்ள சிரமங்கள், டாக்ஸி சேவைகள், வாகன நிறுத்துமிட வசதி உள்ளிட்ட விவகாரங்கள் குறித்து பயணிகள் மற்றும் முதலீட்டாளர்கள் கவலை தெரிவித்து வருவதாக அவர் குறிப்பிட்டுள்ளார்.

தமிழ்நாட்டின் தொழில், உற்பத்தி, தகவல் தொழில்நுட்பம் மற்றும் சுற்றுலாத் துறைகளின் வளர்ச்சிக்கு சர்வதேச தரத்திலான விமான நிலையம் முக்கியமானதாக இருப்பதால், சென்னை விமான நிலையத்தின் நிர்வாகத்தில் மாற்றம் தேவை என முதலமைச்சர் விஜய் வலியுறுத்தியுள்ளார்.

இதன்படி, சென்னை விமான நிலைய நிர்வாகம் AAI-யிடமிருந்து மாற்றப்பட்டு, தனியார் நிறுவனத்திற்கோ அல்லது வேறு தகுதி வாய்ந்த நிறுவனத்திற்கோ ஒப்படைக்க வேண்டும் என பிரதமரிடம் கோரிக்கை விடுக்கப்பட்டுள்ளது. இந்தக் கோரிக்கை குறித்து மத்திய அரசு எடுக்க உள்ள அடுத்தகட்ட நடவடிக்கை எதிர்பார்ப்பை ஏற்படுத்தியுள்ளது.